“Laçın şəhəri üçün MDB-nin mədəniyyət paytaxtı olmaq böyük şərəf idi. Əlbəttə ki, burada inkişaf etmiş film sənayesindən danışmaq hələ tezdir. İlk növbədə, biz şəhərdə kinoteatrı və kinopavilyonu bərpa etdik”.
AZƏRTAC xəbər verir ki, bunu “MDB ölkələrində müasir film istehsalının inkişafı” mövzusunda keçirilən dəyirmi masada Prezidentin Laçın rayonundakı xüsusi nümayəndəsi Məsim Məmmədov bildirib.
“Son bir il ərzində Mədəniyyət Nazirliyinin dəstəyi ilə 2 film çəkə bildik. Həmçinin qeyd etmək istəyirəm ki, Laçın bu sahədə Qarabağın mədəni irsini inkişaf etdirməyə başlayan ilk bölgələrdən biridir. Burada konsert və konqreslərin keçirilməsi üçün zallar tikməyi planlaşdırırıq. Ümid edirəm ki, gələcək əməkdaşlıq kontekstində kino sənayesinə sərmayə qoyacağıq”, – deyə o əlavə edib.
