Laçında Mədəniyyət Nazirliyi və Azərbaycan Respublikası Prezidentinin Laçında xüsusi nümayəndəsi tərəfindən təşkil olunan “MDB-nin Mədəniyyət Paytaxtı 2025” ilinin bağlanış mərasimi keçirilib.
AZƏRTAC xəbər verir ki, Azərbaycan Respublikası Prezidentinin Laçın rayonunda xüsusi nümayəndəsi Məsim Məmmədov öz çıxışında tədbirin Laçın şəhəri üçün əhəmiyyətindən danışıb. O bildirib ki, geriyə baxanda nə dərəcədə nəhəng bir yol keçildiyi aydın görünür.
Məsim Məmmədovun sözlərinə görə, 2025-ci il şəhərdə yeni temp ili olub: “O, bizə canlı, insani, mədəniyyət və yaradıcılıqla zəngin dialoq bəxş etdi. Mədəniyyət Nazirliyi, MDB Dövlətlərarası Humanitar Əməkdaşlıq Fondu ilə birlikdə böyük beynəlxalq tədbirlər keçirmişik. Bu il həm mədəni, həm də ictimai strukturlarımız arasında gələcək və dərinləşən əməkdaşlıq üçün yeni platformaya çevrilib”.
Prezidentin xüsusi nümayəndəsi atılan bütün addımların gələcək tərəfdaşlığın yeni təməli olduğuna əminliyini bildirib.
Milli Məclisin deputatı, Parlamentin Mədəniyyət Komitəsinin sədri Polad Bülbüloğlu qeyd edib ki, mədəniyyət paytaxtları seçilərkən əsas diqqət paytaxt şəhərlərə deyil, ölkələrində böyük mədəni və tarixi maraq doğuran şəhərlərə yönəldilməlidir: “Qeyd etməliyəm ki, Laçının MDB-nin Mədəniyyət Paytaxtı statusuna namizəd göstərilməsi ideyası Prezident İlham Əliyevə məxsusdur və mən hamımız adından dövlətimizin başçısına dərin minnətdarlığımı bildirmək istəyirəm”.
“Laçın Azərbaycanın sərhədidir, Qarabağ torpağıdır. MDB məkanında hazırda Qarabağ torpağının dirçəldilməsi üçün gedən proseslərin düzgün başa düşülməsi çox vacib idi. Burada olan hər kəs Laçının sözün əsl mənasında sürətli dirçəlişinin şahidi oldu. Burada hər şey dağıdılmışdı və qısa müddət ərzində Laçın bu gün Azərbaycanı MDB məkanında təmsil edir”, - deyə o əlavə edib.
Azərbaycan mədəniyyət nazirinin müavini Fərid Cəfərov Laçının bu ilin mədəniyyət paytaxtı seçilməsini işğaldan azad edilmiş ərazilərimizdə mədəniyyət dinamikasının bərpasının inandırıcı sübutu adlandırıb.
Nazir müavini qeyd edib ki, il ərzində Laçında 15-dən çox çoxşaxəli tədbir uğurla keçirilib və bu, şəhərin və regionun mədəni dirçəlişinə əhəmiyyətli dərəcədə töhfə verib: “Bu proqramlar və tədbirlər Laçını regional mədəni əməkdaşlıq üçün dinamik platformaya çevirib”.
Tədbir bədii proqramla davam etdirilib.
