Almaniyada Federal Polis Təşkilatının tərkibində qurulan yeni dron müdafiə bölməsi fəaliyyətə başlayıb.
Brandenburg əyalətinin Ahrensfelde bölgəsində dron müdafiə birliyinin işə düşməsi münasibətilə mərasim keçirilib.
Almaniyanın daxili işlər naziri Aleksandr Dobrindt tədbirdə çıxış edərək, bir neçə həftə əvvəl ölkədə dronların görünməsi ilə bağlı hadisələrin yaşandığını bildirib və dron müdafiə bölməsinin hibrid təhdidlərə qarşı sürətli, dəqiq və yüksək texnologiyalı cavab verəcəyini qeyd edib.
Dobrindt “Təhlükəsizliyimiz üçün mühüm bir mərhələ yaratdıq” deyib.
Nazir casusluq və diversiya fəaliyyətlərinə qarşı mübarizə aparılacağını vurğulayaraq “Çünki dronların yarada biləcəyi hibrid təhdidlərin təhlükəsizliyimiz üçün risk olmasına icazə verə bilmərik” deyə əlavə edib.
Dobrindt bildirib ki, dron müdafiə texnologiyası üçün bu il və gələn il 100 milyon avro investisiya ayrılacaq.
Təxminən 130 polisin xidmət göstərəcəyi dron müdafiə bölməsinin süni intellektlə dəstəklənən siqnal pozucu sistemlərlə təchiz olunduğu bildirilib.
Qeyd edilib ki, bölmədə xidmət edən polis əməkdaşları hava limanları da daxil olmaqla ölkə üzrə təhlükəsizlik baxımından önəmli məntəqələrdə yerləşdiriləcək.
