BAKI, 3 dekabr. TELEQRAF
Ukrayna hüquq-mühafizə orqanları Böyük Britaniya vətəndaşı, 40 yaşlı hərbi təlimçi Ross Devid Katmoru Rusiyaya işləməkdə və qəsdən qətllər planlaşdırmaqda ittiham edərək saxlayıb.
Teleqraf xəbər verir ki, Ukrayna prokurorluğunun məlumatına görə, Dunfermline şəhərindən olan Katmor 2024–2025-ci illərdə Rusiyanın Federal Təhlükəsizlik Xidməti (FSB) tərəfindən Ukrayna ərazisində “hədəfli qətllər” həyata keçirmək üçün cəlb olunub.
Prokurorluğun açıqlamasında deyilir:
“2025-ci ilin mayında o, Ukrayna hərbi bölmələrinin koordinatlarını, təlim mərkəzinin fotolarını və şəxsi heyətin identifikasiyası üçün istifadə oluna biləcək məlumatları ötürüb. Yazışmalarının analizi onun Rusiya xüsusi xidmət orqanları üçün digər tapşırıqları da yerinə yetirdiyini təsdiqləyir.”
Məlumata görə, Katmor bundan əvvəl Britaniya ordusu ilə Yaxın Şərqdə xidmət aparıb və ötən ilin əvvəlində Ukrayna ordusuna, daha sonra isə sərhəd xidməti əməkdaşlarına təlim keçmək üçün ölkəyə gəlib.
“The Times” yazır ki, o, istintaq üzrə əsas şübhəlidir. İddiaya görə, o, şəhər ətrafındakı Ukrayna hərbi hissələri barədə məxfi məlumat verdiyi halda 6 min dollar alıb. Günahı sübuta yetirilərsə, 12 ilədək həbs cəzası ilə üzləşir.
Ukraynanın xüsusi xidmət orqanları bildirir ki, Katmor onlayn pro–Rusiya qruplarında “öz xidmətlərini təqdim edən elanlar” yerləşdirdikdən sonra FSB tərəfindən əlaqəyə götürülüb. Ona partlayıcı qurğu hazırlamaq üçün təlimatlar və silah götürdüyü gizli saxlancın koordinatları göndərilib.
Ukrayna mediası iddia edir ki, Katmor Ukraynalı ictimai fəallar Demyan Hanul və İrina Farionun, eləcə də Ali Rada deputatı Andrey Parubiyin qətlə yetirilməsi üçün silah təmin etməkdə şübhəli bilinir.
Xatırladaq ki, 2022-ci ildə Rusiya Ukraynaya genişmiqyaslı müdaxiləyə başladıqdan sonra prezident Volodimir Zelenski xarici hərbi veteranları ölkənin müdafiəsinə qoşulmağa çağırmış, minlərlə əcnəbi könüllü Ukrayna ordusuna yazılmışdı.
Britaniya Xarici İşlər Nazirliyinin sözçüsü bildirib: “Ukraynada həbs edilən britaniyalı şəxslə bağlı konsul yardımını göstəririk və Ukrayna hakimiyyəti ilə əlaqədəyik.”
