Yeni yollar, aerodromlar və hərbi obyektlər Dehli ilə Pekin arasındakı gərginliyin dərinləşdiyini göstərir...
Poliqon xəbər verir ki, Hindistan Çinlə mümkün silahlı qarşıdurma ehtimalını nəzərə alaraq Himalay dağlarında hərbi və mülki infrastrukturu sürətlə gücləndirir. The Wall Street Journal nəşrinin yazdığına görə, Dehli mübahisəli sərhəd bölgələrində yeni yolların, körpülərin, tunellərin və hərbi aerodromların inşasını prioritet istiqamətə çevirib. Məqsəd həm qoşunların operativ şəkildə bölgəyə çatdırılmasını təmin etmək, həm də çətin relyef şəraitində logistika imkanlarını artırmaqdır.
Qəzet qeyd edir ki, son illərdə Hindistan ordusu Çinlə sərhəddə yerləşən yüksək dağlıq ərazilərdə daimi hərbi mövcudluğunu möhkəmləndirib. Xüsusilə Ladakh, Arunachal Pradeş və digər həssas zonalarda yeni kazarmalar, anbarlar və rabitə infrastrukturu yaradılıb. Hindistan rəsmiləri bu addımları müdafiə xarakterli tədbirlər kimi təqdim etsələr də, ekspertlər bunu Çinlə uzunmüddətli strateji rəqabətin tərkib hissəsi kimi qiymətləndirirlər.
Məlumatda vurğulanır ki, 2020-ci ildə Ladakh bölgəsində baş vermiş və hər iki tərəfdən itkilərlə nəticələnən toqquşmalar Dehli üçün ciddi siqnal olub. Həmin hadisələrdən sonra Hindistan hökuməti sərhəd infrastrukturuna ayrılan vəsaiti əhəmiyyətli dərəcədə artırıb və dağlıq ərazilərdə hərbi hazırlıq səviyyəsini yüksəldib. Bununla yanaşı, hava qüvvələrinin imkanlarının genişləndirilməsi, pilotsuz uçuş aparatlarının və kəşfiyyat vasitələrinin tətbiqi də diqqət mərkəzindədir.
Wall Street Journal yazır ki, Çin də öz növbəsində Tibet bölgəsində oxşar addımlar ataraq hərbi-logistik imkanlarını genişləndirir. Bu isə Himalaylarda təhlükəsizlik balansını daha da həssas edir və iki nüvə dövlətinin qarşıdurma riskini artırır. Analitiklərin fikrincə, tərəflər birbaşa müharibədən qaçmağa çalışsa da, infrastrukturun bu sürətlə militarizasiyası gərginliyin uzun müddət davam edəcəyini göstərir.
Poliqon.info
