Bakı, 26 dekabr, AZƏRTAC
31 Dekabr – Dünya Azərbaycanlılarının Həmrəyliyi Günü və Yeni il ərəfəsində “Həmrəylik günü hamı üçün” adlı korporativ sosial məsuliyyət layihəsi həyata keçirilib.
Layihə çərçivəsində Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi və Dövlət Məşğulluq Agentliyinin, Suraxanı Rayon İcra Hakimiyyəti və “Ballı” marketlər şəbəkəsinin birgə təşkilatçılığı ilə valideyn himayəsindən məhrum olmuş və dövlət himayəsində yaşayan uşaqlar üçün Yeni il şənliyi təşkil edilib.
AZƏRTAC xəbər verir ki, bayram tədbirinə Sosial Xidmətlər Agentliyinin 1, 2 və 3 saylı Uşaq evi sosial xidmət müəssisələrinin, həmçinin uşaq sığınacaqlarının 250 sakini qatılıb.
Animatorlar, Şaxta baba və digər personajların iştirakı ilə hazırlanmış əyləncəli proqram, oyun və yarışlar, eləcə də hədiyyələr uşaqlara əsl bayram əhvali-ruhiyyəsi yaşadıb.
