Lənkəran, 6 yanvar, İlkin Adıyev, AZƏRTAC
Lənkəranda ikimərtəbəli evdə yanğın olub. Hadisə səhər saatlarında rayonun Göyşaban kəndi ərazisində qeydə alınıb.
AZƏRTAC-ın bölgə müxbiri xəbər verir ki, kənd sakini Şamil Həsənağa oğlu Qurbanova məxsus ikimərtəbəli 8 otaqlı evdə başlayan yanğın bir anda ətrafa yayılıb.
Dərhal hadisə yerinə FHN-nin Lənkəran yanğından mühafizə hissəsinin texnikası və canlı qüvvəsi cəlb olunub. Yanğın qısa müddətdə söndürülüb. Alovun digər otaqlara keçməsinin qarşısı alınıb.
Daxili İşlər Nazirliyinin Mətbuat Xidmətinin Lənkəran regional qrupundan AZƏRTAC-ın bölgə müxbirinə isə bildirilib ki, yanvarın 6-da Lənkəran rayonunun Göyşaban kəndi ərazisində yerləşən evlərin birindən oğurluq edilməsi, daha sonra həmin ünvanda yanğın hadisəsinin baş verməsi ilə bağlı polisə müraciət daxil olub. Hazırda həmin müraciət üzrə araşdırma aparılır.
