Ağ Ev Donald Tramp adminstrasiyasının Danimarka ərazisi olan Qrenlandiyanı ələ keçirməyi müzakirə etdiyini bəyan edib. Metbuat.az xəbər verir ki, bu barədə Ağ Evin sözçüsü Karolin Livit açıqlama verib. O bildirib ki, məsələ prezident və onun milli təhlükəsizlik qrupu tərəfindən nəzərdən keçirilir. Tramp administrasiyasının Qrenlandiyanı ilhaq etmək üçün hərbi variantı nəzərdən keçirib-keçirmədiyi barədə suala cavab olaraq Livit bildirib ki, bütün variantlar həmişə masadadır, lakin Trampın prioriteti həmişə diplomatiyadır. Qeyd edək ki, Tramp administrasiyası Qrenlandiyanın ABŞ-nin təhlükəsizliyi üçün vacib ərazi olduğunu bəyan edib. Avropa liderləri birgə bəyanatda Danimarkaya dəstəklərini ifadə edərək, Qrenlandiyanın öz xalqına məxsus olduğunu və sərhədlərin toxunulmazlığı prinsipinə hörmət edilməli olduğunu bildiriblər.
