Berlin, 9 yanvar, AZƏRTAC
Almaniyanın bir sıra əyalətlərində tüğyan edən “Elli” fırtınası Bundesliqanın da oyunlarına təsir edib.
AZƏRTAC xəbər verir ki, Alman Futbol İttifaqı (DFB) ölkə çempionatının 16-cı turu çərçivəsində keçirilməli olan iki qarşılaşmanın – “Verder Bremen” - “Hoffenhaym” və “St Pauli” - “Leypsiq” görüşlərinin fırtına ilə əlaqədar təxirə salındığını açıqlayıb.
Hər iki klubun rəhbərlikləri stadionlarda xeyli həcmdə qar kütləsinin toplanması və ərazinin buz bağlanmasının oyunların keçirilməsinə imkan verməməsi barədə DFB-yə müraciət etdikdən sonra belə bir qərar qəbul olunub.
Hər iki oyunun yanvarın 10-da keçirilməsi nəzərdə tutulurdu.
Elvin Mövsüm
AZƏRTAC-ın xüsusi müxbiri
Berlin
