Bakı, 15 yanvar, AZƏRTAC
AZƏRTAC-ın “Mən turist olsaydım” rubrikası: Beynəlxalq Muğam Mərkəzi.
Bakının mədəni həyatının mühüm ünvanlarından biri olan Beynəlxalq Muğam Mərkəzi həm yerli sakinlərin, həm də paytaxtımıza gələn turistlərin maraqla ziyarət etdiyi məkanlardandır. Milli musiqi irsimizin təbliği məqsədilə yaradılan bu mərkəz müasir memarlıq üslubu və zəngin fəaliyyət proqramı ilə seçilir.
Binanın memarlıq forması Azərbaycanın qədim musiqi alətlərindən olan tarın hissələrini xatırladır. Beynəlxalq Muğam Mərkəzində 350 yerlik konsert salonu, muzey və səsyazma studiyası fəaliyyət göstərir. Mərkəzin muzey hissəsində görkəmli muğam ustadlarının büstləri qoyulub. Həmçinin burada Azərbaycan musiqi irsinin incisi sayılan qədim milli musiqi alətləri nümayiş etdirilir.
Beynəlxalq Muğam Mərkəzinin inşası Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə həyata keçirilib. Prezident İlham Əliyev və birinci xanım Mehriban Əliyevanın rəhbərliyi ilə ölkəmizdə muğam sənətinin qorunması, inkişafı və dünyada tanıdılması istiqamətində ardıcıl və məqsədyönlü addımlar atılır.
Beynəlxalq Muğam Mərkəzi milli musiqi irsimizin təbliği və onun gələcək nəsillərə ötürülməsi yolunda öz missiyasını uğurla davam etdirir.
