Türkiyənin ASELSAN şirkəti Dohada keçirilən DIMDEX-2026 sərgisi çərçivəsində Qətar “Barzan Holdings” şirkəti ilə bir neçə saziş imzalayıb.
ASELSAN “Poliqon”a verilən məlumata görə, bu sazişlər uzunmüddətli strateji tərəfdaşlığı möhkəmləndirir və regionda birgə texnologiya inkişafını irəli aparır.
Sazişlərin bir hissəsi olaraq, ASELSAN və “Barzan Holdings” BARQ adlı birgə müəssisələrinin yeni imkanları əhatə edəcək şəkildə genişləndirildiyini elan ediblər ki, bu da ikitərəfli müdafiə sənayesi əməkdaşlığında yeni mərhələnin başlandığını göstərir.
Sazişlər ASELSAN-ın vitse-prezidenti Özgür Taylan Sarı və “Barzan Group”un baş icraçı direktoru Mohamed Badr Al-Sadah tərəfindən imzalanıb. İmza mərasimində Türkiyə Müdafiə Sənayesi Komitəsinin sədri Haluk Görgün və Qətər Baş nazirinin müavini, Dövlət üzrə müdafiə məsələləri naziri və “Barzan Holdings”in İdarə Heyətinin sədri Şeyx Saoud bin Abdulrahman bin Hassan bin Ali Al Thani iştirak ediblər.
Birgə müəssisənin genişləndirilmiş fəaliyyət dairəsi yüksək texnologiyalı sahələri və seçilmiş yerli istehsal imkanlarını əhatə edəcək, eyni zamanda Qətər ilə Türkiyə arasında texnologiya transferini, sənaye bilik və təcrübəsini, habelə yerli mütəxəssis potensialının inkişafını irəli aparacaq. Bu təşəbbüs ASELSAN və “Barzan Holdings”in yerli imkanların inkişafı, strateji tərəfdaşlıqlar və uzunmüddətli sənaye əməkdaşlığı vasitəsilə dayanıqlı müdafiə ekosistemi qurmaq istiqamətində ortaq baxışını əks etdirir.
ASELSAN və “Barzan Holdings” bildiriblər ki, BARQ birgə müəssisəsinin genişləndirilməsi Yaxın Şərq müdafiə ekosistemi üzrə birgə imkanların gücləndirilməsi istiqamətində mühüm addımdır. Qabaqcıl yüksək texnologiyalı xidmətlərin seçilmiş yerli istehsal imkanları ilə inteqrasiyası yolu ilə tərəflər daha dayanıqlı və gələcəyə hazır həllərin təqdim olunmasını təmin etməyi hədəfləyirlər.
