Xəbər verildiyi kimi, Azərbaycanın aparıcı banklarından olan «PAŞA Bank»ın səhmlərinin 5%-i İlkin Kütləvi Təklif – İPO üsulu ilə əhaliyə satılacaq. Bu təxminən 933 min ədəd səhm deməkdr.
FED.az biznes və maliyyə portalının məlumatına görə, Bankın sədri Cavid Quliyev bildirib ki, bankın səhmlərini alan şəxslər onun 2025-ci il üzrə mənfəətindən dividend ala biləcəklər.
O bildirib ki, səhmlərin satışı may ayınadək davam edəcək: «Planlaşdırırıq ki, bu ilin may ayının ortalarına qədər PAŞA Bankın Səhmlərin İlkin Kütləvi Təklif üsulu ilə yerləşdirilməsi və abunə yazılışı başa çatsın».
Bank sədri bildirib ki, bankın 2025-ci ildəki mənfəətindən yeni səhmdarlar da dividend alacaqlar: «Bu o deməkdir ki, bankın ötən il ərzində qazandığı gəlirlərdən dividend ödənişləri yeni səhmdarlar da faydalanacaq. Sadəcə vaxt cəhətdən bunu biz bazara bildirəcəyik. Əsas məsələ odur ki, yeni səhmdarlar 2025-ci ilin dividend ödənişlərindən faydalanacaqlar»", - deyə o, bildirib.
Qeyd edək ki, bu üsulu – yeni səhmdarların əvvəlki ilin mənfəətindən də dividend alması imkanını Azərbaycanın bank sektorunda ilk dəfə Azərbaycan Beynəlxalq Bankı – ABB tətbiq edib. 2025-ci ildəki səhm buraxılışı zamanı bankın səhmini alan yeni səhmdarlar ABB-nin 2024-cü il üzrə mənfəətindən də dividend alıblar.
Xatırladaq ki, 2025-ci ildə «Paşa Bank»ın xalis mənfəəti azalıb. Bank ötən il 148 milyon manat xalis mənfəət əldə edi b ki, bu da 2024-cü illə müqayisədə 62 milyon manat və ya 30% azdır. Belə ki, bank 2024-cü ildə 210 milyon mənfəət əldə etmişdi. 2023-cü ildə isə bankın xalis mənfəəti 199,2 milyon manat olmuşdu.
