ain.az xəbər verir, Azertag saytına əsaslanaraq.
Fevralın 17-də Bakı şəhərindəki “Landmark” hotelində “Ansys: Rəqəmsal Mühəndislik və İnnovasiya Həlləri Azərbaycanda” adlı konfrans keçirilib. Tədbir Azərbaycanın aparıcı sistem inteqratoru olan “AZEL Systems” və nəqliyyat, telekommunikasiya, aviasiya və enerji kimi sahələrdə layihələrin optimallaşdırılması, təhlükəsizliyin artırılması və innovasiyaların təşviqi üçün istifadə olunan mühəndislik simulyasiya proqram təminatının qlobal təchizatçısı olan ABŞ-nin “Ansys” şirkəti ilə əməkdaşlığı çərçivəsində təşkil edilib. Konfrans, eyni zamanda, Azərbaycan ilə ABŞ arasında texnoloji əməkdaşlığın gücləndirilməsinə töhfə verərək, rəqəmsal mühəndislik həllərinin strateji əhəmiyyətini ön plana çıxarıb.
Konfransı giriş sözü ilə açan “AZEL Systems” şirkətinin baş direktoru İqor Yakovenko bildirib ki, şirkət informasiya texnologiyaları və rəqəmsallaşma texnologiyalarının tətbiqi üzrə ixtisaslaşıb. O, mühəndislik simulyasiya həllərinin üstünlüklərini vurğulayaraq, layihələndirmə risklərinin azaldılması, rəqəmsal transformasiyanın sürətləndirilməsi və xərclərə daha effektiv nəzarətin təmin edilməsi üçün yalnız lisenziyalı proqram təminatından istifadənin vacibliyini qeyd edib. O, həmçinin bu cür təşəbbüslərin Azərbaycanın rəqəmsal iqtisadiyyatının inkişafına və beynəlxalq texnoloji əməkdaşlığın genişlənməsinə töhfə verdiyini bildirib.
Sonra “Ansys, part of Synopsys (NASDAQ: SNPS)” şirkətinin vitse-prezidenti Cim Çiamardas müxtəlif sənaye sahələri üzrə şirkətin həlləri barədə qısa icmal təqdim edib. O, xüsusilə neft-qaz sektoruna bu texnologiyaların gətirə biləcəyi dəyər və üstünlüklərə diqqət yetirib. O, həmçinin “Ansys” şirkətinin EMEA (Avropa, Yaxın Şərq və Afrika) regionunda, o cümlədən Azərbaycanda fəaliyyətini genişləndirməyi hədəflədiyini vurğulayıb.
Əqli Mülkiyyət Agentliyinin aparat rəhbəri Xudayət Həsənli proqram təminatından istifadə kontekstində əqli mülkiyyətin hüquqi qorunmasının əhəmiyyətindən danışıb və həm Agentliyin, həm də dövlətin əqli mülkiyyət hüquqlarının qorunmasını vacib prioritetlərindən biri kimi qəbul etdiyini vurğulayıb. Qeyd edib ki, yaxın beş ildə süni intellekt məhsullarının müəllif hüquqları ilə bağlı hüquqi mexanizmlərin müəyyənləşdirilməsi zəruridir.
Konfrans texniki sessiya ilə davam edib. “Ansys, part of Synopsys (NASDAQ: SNPS)” şirkətinin Mərkəzi Asiya və MDB üzrə regional satış direktoru Pavel Bruk “Ansys” həllərinin texniki imkanları barədə ətraflı təqdimatla çıxış edərək, onların müxtəlif mühəndislik problemlərinin həllinə və xərclərin optimallaşdırılmasına necə töhfə verdiyini izah edib. O, rəqəmsal mühəndislik üçün “Ansys” proqram təminatının funksiyalarını təqdim edib və onların dünyanın müxtəlif sənaye sahələrində praktik tətbiqi ilə bağlı nümunələr bölüşüb. Bundan əlavə, süni intellektin “Ansys” həllərinə inteqrasiya olunduğu əsas istiqamətləri vurğulayaraq, bu gün qoyula biləcək strateji investisiyaların Azərbaycan şirkətləri üçün rəqəmsal transformasiyanı əhəmiyyətli dərəcədə sürətləndirəcəyini diqqətə çatdırıb. O, həmçinin qeyd edib ki, qabaqcıl simulyasiya texnologiyaları yüksək texnoloji sahələrdə məhsulun hazırlanma müddətini əhəmiyyətli dərəcədə qısalda bilər.
Daha sonra “AZAL” MMC Milli Aviasiya Akademiyasının Aerokosmik Avadanlıqlar kafedrasının müəllimi Səxavət Əmirbəyli Akademiyanın “Ansys” həllərinin uğurlu tətbiqi üzrə praktiki təcrübəsini bölüşüb. Qeyd edib ki, “Ansys” simulyasiya platforması Milli Aviasiya Akademiyasında bakalavr və magistr səviyyələrində aerokosmik mühəndislik təhsilində təyyarə sistemlərinin qabaqcıl analizi, modelləşdirilməsi və layihələndirilməsini dəstəkləmək məqsədilə geniş istifadə olunur. Proqram təminatı tələbələrə ədədi modelləşdirmə və mühəndislik optimallaşdırması üzrə mühüm səriştələr qazandırır və müasir aerokosmik texnologiyalarla uyğunluq təşkil edir. O, həmçinin süni intellektin “Ansys” həllərinə inteqrasiya olunduğu əsas istiqamətlərin innovasiya potensialını və yeni nəsil, dayanıqlı və yüksək səmərəli aviasiya texnologiyaları üçün rəqəmsal mühəndisliyin inkişafını gücləndirdiyini vurğulayıb. Əlavə edib ki, “Ansys” texnologiyalarının tətbiqi Akademiyada rəqəmsal modelləşdirmə imkanlarını genişləndirir və yüksək ixtisaslı mühəndis kadrların hazırlanmasına töhfə verir.
Təqdimatlar iştirakçılar tərəfindən böyük maraqla qarşılanıb. İştirakçılar və məruzəçilər müzakirə olunan mövzularla bağlı fəal şəkildə fikir mübadiləsi aparıblar. İştirakçılar təqdim olunan texnologiyaların praktiki əhəmiyyətini və onların ölkənin əsas sənaye sahələrində tətbiq potensialını xüsusi vurğulayıblar.
Konfransda Azərbaycan Təhsil Nazirliyinin, ABŞ-nin ölkəmizdəki səfirliyinin, Sumqayıt Texnologiyalar Parkının, “COPAT”ın, Milli Aviasiya Akademiyasının, Dövlət Şəhərsalma və Arxitektura Komitəsinin, eləcə də digər dövlət qurumları və sənaye təşkilatlarının nümayəndələri iştirak ediblər. ABŞ-nin Azərbaycandakı səfirliyinin iqtisadi və ticarət məsələləri üzrə nümayəndəsi Eşli Tauers konfrans iştirakçılarına uğurlar arzulayaraq, ABŞ ilə Azərbaycan arasında biznes və iqtisadi əməkdaşlığın inkişafının vacibliyini vurğulayıb.
Konfrans “AZEL Systems”, “Ansys” və digər dəvət olunmuş qonaqların nümayəndələrinin iştirakı ilə keçirilən sual-cavab sessiyası ilə yekunlaşıb və iştirakçılara əlavə fikir mübadiləsi aparmaq imkanı yaradılıb. Tədbir Azərbaycanda dayanıqlı sənaye inkişafının dəstəklənməsində rəqəmsal mühəndislik və simulyasiya texnologiyalarının artan rolunu bir daha təsdiqləyib.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
