İsrail-Amerika-İran müharibəsinin başlanması Ukrayna üçün çox böyük əhəmiyyət kəsb edir, sadəcə ona görə ki, bu, birjada neft qiymətlərinin çox mümkün bir şəkildə artmasına səbəb olacaq. Müvafiq olaraq, bu, neftdən pul qazanan Rusiya üçün daha çox mənfəətə və müvafiq olaraq xərclərin azalmasına, beynəlxalq neft məhsulları bazarından neft alan Ukrayna üçün daha çox xərcə səbəb olacaq. Amma bu, sırf iqtisadi aspektdir.
Bu fikri AZƏRTAC-a açıqlamasında siyasi ekspert İvan Us söyləyib.
Siyasi aspektə gəldikdə isə İvan Us bildirib ki, prosesin dinamikasını izləmək lazımdır.
“Bu, qısamüddətli münaqişə olacaqsa, özünə çox diqqət tələb etməyəcək və ən əsası, Amerikanın Ukraynaya sata biləcək silahlardan istifadə etməsinə gətirib çıxarmayacaq. Yəni, indi, regiondakı qarşıdurma yeni başlayanda, onun nə qədər davam edəcəyini demək hələ çətindir. İctimaiyyətə açıq olan məlumatlarda müharibənin 3-4 gün davam edəcəyi bildirilir. Əgər 3-4 gün davam edərsə, Ukrayna yəqin ki, razı qalacaq, çünki bu, diqqəti azaltmayacaq və ən əsası, hərbi resursları başqa yerə yönəltməyəcək. Münaqişə uzun çəkərsə, bunun Ukrayna üçün fəsadları daha pis ola bilər. Ancaq paralel olaraq bundan Rusiya da əziyyət çəkəcək”, - deyə İvan Us bildirib.
Ukraynalı ekspert hesab edir ki, İran Ukraynada əsasən Rusiyanın müttəfiqi kimi qəbul edilir. Buna görə də, Rusiyanın İrana dəstəyi ilə bağlı hərəkətləri yaxından izlənilməlidir.
İvan Us deyib: “Ayrı-ayrı rus siyasətçilərin İranı dəstəkləyən açıqlamaları dünyada İran, Rusiya və Şimali Koreyadan ibarət yeni bir qüvvə nəzəriyyəsinin təsdiqi kimi qəbul edilə bilər. Müvafiq olaraq, əgər ABŞ bu qüvvələrdən biri ilə mübarizə apararsa, qalan ikisinə də qarşı çıxmalı olacaq ki, bu da şübhəsiz ki, Ukraynaya sərf edəcək”.
