Tatarıstanın Azərbaycandakı daimi nümayəndəliyi Ümumdünya Tatar Mətbəxi Gününü mədəni-maarif tədbiri ilə qeyd edib.
“İki sahil” xəbər verir ki, tədbirin məqsədi tatar milli mədəni və kulinariya irsinin qorunması, inkişaf etdirilməsi və təbliği, mənəvi dəyərlərin gücləndirilməsi, millətlərarası mədəni qarşılıqlı əlaqənin təşviqidir.
Tədbir “Ak Kalfak” Tatar Qadınlar Cəmiyyəti və Bakı Təhsil və Mədəniyyət Mərkəzi “Kayum Nəsiri İnstitutu” tərəfindən təşkil olunub.
Tədbirdə tatar icmasının nümayəndələri, mədəniyyət xadimləri, yaradıcı qruplar, təhsil mərkəzinin tələbələri, tatar xalqının milli mədəniyyəti və adət-ənənələri ilə maraqlanan qonaqlar iştirak ediblər.
Proqram çərçivəsində iştirakçılara tatar milli mətbəxinin tarixi və ənənələrinə, onun milli kimliyin formalaşmasında və tatar xalqının mədəni dəyərlərinin qorunmasında əhəmiyyətinə həsr olunmuş tematik video nümayiş etdirilib.
Konsert proqramında “Lalə” və “Ak Kalfak” ansambllarının çıxışları, eləcə də tatar xalq və müasir musiqisini təqdim edən solo ifaçılar yer alıblar. K. Nasiri Mərkəzinin gənc tələbələri tatar yeməklərinə həsr olunmuş şeirlər oxuyublar.
Tədbirin mühüm bir hissəsi ənənəvi tatar yeməklərinin hazırlanması üzrə ustad dərsləri olub. “Ak Kalfak” cəmiyyətinin rəhbəri Saniyə Almyaşeva tatar qaymaqlarının hazırlanması üzrə ustad dərsi keçirib və tatar əriştəsinin əl ilə kəsilməsinin ənənəvi texnikasını nümayiş etdirib.
İştirakçılar tatar yeməklərinin hazırlanması üzrə özlərini sınamaq imkanı əldə ediblər. Ustad dərsləri milli birlik və mədəni davamlılıq ab-havasının yaradılmasına töhfə verən şən tatar melodiyalarının ifası ilə müşayiət olunub.
