Bakı, 2 mart, AZƏRTAC
Potomak çayının sahillərində yerləşən ağ daşlı binalar və əfsanəvi abidələrdən ibarət Vaşinqton şəhəri ilk baxışdan nizam-intizamlı görünür: geniş prospektlər, simmetrik plan, ağ mərmər binalar… Paytaxt funksiyasını yerinə yetirmək üçün salınan şəhərdə ümumi razılığa əsasən, Kapitolidən hündür bina tikməyə icazə verilmir. Həmin qadağının məqsədi ölkədə Konqresin və qanunların hər şeydən uca olduğunu göstərməkdir. Şəhərdə kifayət qədər 10-12 mərtəbəli binalar var. Lakin Kapitoli təpəlikdə tikildiyindən digər binalar onun əzəməti qarşısında çox kiçik görünürlər.
Şəhərə xüsusi romantizm qatan Potomak çayı sahilində gəzmək, günəşin su üzərində bərq vuran şüalarını seyr etmək sükut və sakitlik hissi doğurur. Vaşinqton yalnız tarixi abidələrdən ibarət deyil. Şəhərin küçələrində modern binalar, kitabxanalar, muzeylər və müxtəlif mədəniyyət mərkəzləri müsafirlərin üz tutduğu məkanlardandır. Amerika paytaxtının ürəyi təkcə siyasətlə döyünmür. Şəhərin mədəni nəfəsi muzeylərində yaşayır. Muzeylər elm, incəsənət, kosmos və insan tarixini bir araya gətirir. Kafelərdə tələbələr müzakirələr aparır, musiqiçilər küçə künclərində caz ifa edir, kitab dükanlarının vitrinləri fikir dünyasına açılan qapıya çevrilir. Burada siyasətin sərt konturları gündəlik həyatın yumşaqlığına qarışır.
Vaşinqtonda məşhur ünvanlardan biri də Ağ evdir. Ağ fasadın arxasında dünya siyasətinin ən mühüm qərarları qəbul edilir. Lakin bu bina həm də paradoksun rəmzidir: bir tərəfdə mühafizə və protokol, digər tərəfdə isə turistlərin maraqlı baxışları, şəkil çəkdirən uşaqlar, suvenir satan kiçik köşklər… Paytaxt həm də ziddiyyətlər şəhəridir. Küçənin birində diplomatların qara maşın karvanı keçəndə başqa bir küçədə gənclər velosipedlə şütüyürlər. Azadlıq, bərabərlik və ədalət naminə yüz minlərin toplaşdığı Vaşinqtonun bir özəlliyi də iri zavod və fabriklərin olmamasıdır.
Paytaxt həm də təzadlar şəhəridir. Bir tərəfdə qlobal siyasətin ağır məsuliyyəti, digər tərəfdə isə adi insanların gündəlik qayğıları. Bir küçədə diplomatların qara maşın karvanı keçir, başqa bir küçədə isə velosiped sürən gənclər gülərək yanından ötür. Vaşinqton bütün bu fərqlilikləri özündə daşıyaraq bütöv qalmağı bacarır. Burada müxtəlif ölkələrdən gələnlər bir araya gəlir, fikir mübadiləsi aparırlar.. Siyasi qərarlar, diplomatik görüşlər və gündəlik həyatın ritmi Amerika paytaxtını dünya xəritəsində xüsusi yerə qoyur...
Foto Orxan Kərimov
