Mənbələrə görə, Iraq-Iran sərhədi yaxınlığında 8000-ə qədər kürd döyüşçüsü cəmləşib və yaxın gələcəkdə İrana qarşı hücuma keçə bilərlər.
Moderator.az israil mediasına istinadla xəbər verir ki, bu haqd "Reuters" agentliyi məlumat yayıb.
Kürd qrupları ilə ABŞ və İsrail arasında danışıqlardan xəbərdar mənbələrə əsaslanaraq verilən məlumata görə, İraq-İran sərhəd bölgəsində yerləşən kürd silahlı qrupları İrana qarşı quru əməliyyatı başlatmağı düşünür.
Mənbələrə görə, sərhədin İraq tərəfində artıq minlərlə döyüşçü cəmləşib. İlkin hesablamalara görə, onların sayı 5000 ilə 8000 arasındadır. Bu qüvvələrin bir həftə ərzində hücuma keçməyə hazır olduqları bildirilir. Ancaq "Reuters bu məlumatı müstəqil şəkildə təsdiqləyə bilmədiyini qeyd edir.
Kürd mənbələri iddia edir ki, İran daxilindəki kürd birləşmələri ABŞ və İsrailə sərhəd əraziləri haqqında kəşfiyyat məlumatları paylaşır. Potensial əməliyyatın Üşnava və Piranşəhr əraziləri də daxil olmaqla, İran-Azərbaycan sərhədi boyunca bir neçə yaşayış məntəqəsini ələ keçirməyə yönələ biləcəyinə inanılır.
Bu arada, kürd liderlərinin özləri quru əməliyyatının başlaması ilə bağlı hələlik yekun qərarın verilmədiyini bildirirlər. İran kürd təşkilatlarından birinin baş katibi "Əl-Cəzirə"yə verdiyi müsahibədə belə bir ssenarinin nəzərdən keçirildiyini, lakin hazırlıqların hələ də davam etdiyini bildirib.
Mənbələrə görə, kürd qüvvələri əsasən yüngül silahlara malikdir və əlavə yardıma ehtiyacları ola bilər. Tələb olunan aktivlər arasında hava hücumundan müdafiə sistemləri, dronlar, kiçik silahlar və artilleriya var. Bununla belə, hər hansı bir böyük əməliyyatın hava dəstəyi tələb edəcəyi bildirilir.
Mənbələr həmçinin qeyd edirlər ki, İsrail və ABŞ kürd qrupları ilə əlaqə saxlayırlar. Bir İsrail mənbəyinə görə, bu cür hərəkətlərin məqsədi İran rəhbərliyini devirmək deyil, Tehrana təzyiq yaratmaq və İslam İnqilabı Keşikçiləri Korpusunun diqqətini yayındırmaq ola bilər.
