ABŞ-ın müdafiə naziri Pit Heqset ölkəsi və İsrailin İrana qarşı həyata keçirdiyi hücumlarla bağlı verdiyi açıqlamada "bu cür hadisələr can itkisi olmadan baş vermir və daha çox can itkisi olacaq" deyib.
AFN.az xəbər verir ki, Heqset CBS televiziyasının "60 Minutes" proqramında hərbi əməliyyatlara dair sualları cavablandırarkən ABŞ Prezidenti Donald Trampın can itkilərinin qaçılmaz olacağına dair fikirlərini dəstəkləyib.
Xüsusilə amerikalıların vətənə tabutda qayıtmasının nə demək olduğunu bildiyini dilə gətirən nazir, bu vəziyyətin onları zəiflətmədiyini, əksinə, müharibəni qələbə ilə bitirmək əzmlərini artırdığını vurğulayıb.
Heqset həmçinin aşağıdakı mühüm məqamları qeyd edib:
İran donanmasına məxsus daha çox gəmi batırılacaq;
Hücumlarda hələ ki, idarə olunmayan bombaların istifadə edildiyi mərhələyə keçilməyib;
İran bir nöqtədə müharibə apara bilməyəcək vəziyyətə gələcək və təslim olacaq.
Nazir Tehranın Donald Trampın bu məsələdəki qətiyyətini zamanla daha yaxşı anlayacağını bildirib. Heqsetin sözlərinə görə, ABŞ-ın hərbi arsenalı hələ tam gücü ilə işə düşməyib.
