BMT Təhlükəsizlik Şurası İranın Fars körfəzindəki qonşu dövlətlərə hücumlarına dərhal son qoyulmasını tələb etdi.
Herbiand.az xəbər verir ki, müvafiq qətnamə 11 mart çərşənbə günü beynəlxalq hüquq və təhlükəsizliyin qorunmasından məsul olan əsas BMT orqanının 15 üzv ölkəsindən 13-nün səsverməsi ilə qəbul edilib.
Qətnamə Körfəz Ərəb Dövlətləri Əməkdaşlıq Şurasının üzvləri (Birləşmiş Ərəb Əmirlikləri, Səudiyyə Ərəbistanı, Küveyt, Oman, Qətər və Bəhreyn) və İordaniya tərəfindən təqdim edilib. Qətnamədə bildirilir ki, İranın bu dövlətlərə hücumları beynəlxalq hüququ pozur və "qlobal sülh və təhlükəsizliyə ciddi təhdid" yaradır.
Qətnamədə İrana qarşı hərbi əməliyyatlara başlayan ABŞ və İsraildən bəhs edilmir.
Qətnamədə həmçinin Tehranın "Hörmüz boğazından beynəlxalq gəmiçiliyi bloklamaq, maneə törətmək və ya başqa şəkildə pozmaq" məqsədi daşıyan "hər hansı hərəkəti və ya təhdidi" pislənir. Yaxın Şərqdən neft ixracı üçün ən vacib nəqliyyat arteriyalarından biri kimi xidmət edən bu boğaz, ABŞ-İsrail müharibəsinin başlanğıcından bəri Tehran tərəfindən faktiki olaraq blokada altında saxlanılıb.
