Bir çox sahibkar üçün marketinq, rəngli afişalar və səs-küylü reklam çarxlarından ibarət bir vitrindir. Lakin reallıqda reklam, nəhəng bir marketinq mexanizminin yalnız ən son və ən görünən halqasıdır. Bizneslər bu "parıltılı" reklamların kölgəsində qalan bəzi kiritik detalları gözardı edirlər.
Bəs həqiqətən marketinq sadəcə reklamdırmı?
Marketoloq Samir Mehdiyev Valyuta.az-a bildirir ki, bir çox sahibkar marketinq deyəndə ilk olaraq reklamı düşünür:
"Facebook" reklamları, "Google Ads" və ya müxtəlif kampaniyalar… Amma bu yanaşma marketinqin əsl mahiyyətini xeyli daraldır. Əslində isə reklam marketinqin yalnız görünən hissəsidir. Marketinq daha dərindən, müştərini anlamaqla başlayır. Onun nə istədiyini, hansı problemi yaşadığını və hansı həlli axtardığını başa düşmədən edilən hər bir reklam sadəcə təsadüfi nəticələr verə bilər.
Bu səbəbdən də bir çox biznes reklama pul xərcləyir, amma istədiyi nəticəni əldə etmir. Əsas problemlərdən biri odur ki, bizneslər məhsulu ön plana çıxarmağa çalışır, amma dəyəri izah etmirlər. Halbuki insanlar məhsul almır, onlar probleminin həllini alır. Əgər sən müştərinin problemini düzgün təqdim etmirsənsə, ən yaxşı reklam belə sənin üçün işləməyəcək".
"Digər bir məsələ isə strategiyanın olmamasıdır. Plansız şəkildə edilən marketinq fəaliyyəti çox vaxt sadəcə büdcə itkisinə çevrilir. Marketinq təsadüfi addımlar deyil, ardıcıl və düşünülmüş qərarlar sistemidir. Bu sistem olmadan isə uzunmüddətli nəticə əldə etmək demək olar ki, mümkün deyil. Bundan əlavə, bir çox biznes qısamüddətli nəticələrə fokuslanır. Reklam verdikdən dərhal sonra satış gözləyirlər və əgər bu baş vermirsə, marketinqin işləmədiyini düşünürlər. Halbuki güclü marketinq zamanla formalaşır? brendin tanınması, güvənin yaranması və müştəri ilə əlaqənin qurulması bir günün işi deyil" - deyə S.Mehdiyev qeyd edir.
Marketoloq deyir ki, ən kritik çatışmazlıqlardan biri də analitikanın nəzərə alınmamasıdır:
"Nəyin işlədiyini, nəyin işləmədiyini ölçmədən qərar vermək biznesi kor idarə etmək kimidir. Marketinq rəqəmlərlə işləyir və bu rəqəmlər düzgün oxunmadıqda nəticə də təsadüfi olur. Nəticə olaraq, marketinq sadəcə reklam deyil. Bu, biznesin böyüməsini təmin edən kompleks bir sistemdir. Müştərini anlamaqdan başlayıb, ona dəyər yaratmaq və bu dəyəri düzgün şəkildə çatdırmaqla davam edən bir prosesdir. Reklam isə bu prosesin sadəcə bir hissəsidir. Marketinqi düzgün başa düşən bizneslər yalnız satış etmir? onlar bazarda mövqe qurur və davamlı şəkildə böyüyür".
Tənzilə Ağabalayeva
