Təklif nüvə obyektlərinin sökülməsi və uranın zənginləşdirilməsindən imtinanı nəzərdə tuturdu...
İran ABŞ tərəfindən təqdim olunan və münaqişənin tənzimlənməsinə yönəlmiş 15 maddəlik planı qəbul edə bilməyəcəyini Pakistana rəsmi şəkildə çatdırıb.
Poliqon xəbər verir ki, bu barədə “Al Mayadeen” telekanalı məlumat yayıb.
Məlumata görə, sözügedən sənəd Tehranın nüvə və hərbi fəaliyyətlərinə ciddi məhdudiyyətlər qoyulmasını nəzərdə tuturdu. Plan çərçivəsində İranın üç əsas nüvə obyektinin tam şəkildə sökülməsi, uranın zənginləşdirilməsindən tam imtina edilməsi və ölkənin raket proqramının dayandırılması tələb olunurdu.
Bundan əlavə, sənəddə İranın regionda fəaliyyət göstərən proksi qruplara dəstəyinin məhdudlaşdırılması və Hörmüz boğazının tam şəkildə açılması kimi mühüm şərtlər də yer alıb. Qeyd olunur ki, bu bəndlər ABŞ-nin regionda təhlükəsizlik və enerji daşımalarının sabitliyini təmin etmək məqsədi daşıyır.
Mənbələr bildirir ki, Tehran bu şərtləri ölkənin suverenliyinə və milli təhlükəsizlik maraqlarına zidd hesab edir. İran rəhbərliyi xüsusilə nüvə proqramı və raket imkanlarının məhdudlaşdırılması ilə bağlı tələbləri qəbuledilməz sayır və bu məsələlərdə geri addım atmaq niyyətində olmadığını vurğulayır.
Ekspertlər hesab edirlər ki, İranın bu planı rədd etməsi regionda gərginliyin davam edəcəyinə işarədir. Eyni zamanda, tərəflər arasında diplomatik kanalların açıq qalması ehtimalı da istisna edilmir, lakin mövcud fikir ayrılıqları danışıqların yaxın perspektivdə nəticə verməsini çətinləşdirir.
Poliqon.info
