Böyük Britaniya Baş Naziri Keir Starmer Britaniya hərbi heyətinə Böyük Britaniya sularında sözdə "kölgə donanması" gəmilərini ələ keçirməyə icazə verib. Oxuməni.az xəbər verir ki, bu barədə nazir ofisinin yaydığı açıqlamada bildirilib.
Bəyanatda deyilir: "Baş Nazir razılaşıb ki, Böyük Britaniya Silahlı Qüvvələri və hüquq-mühafizə orqanları əməkdaşları artıq Böyük Britaniya sanksiyalarına məruz qalan və Böyük Britaniya sularından tranzit keçən gəmiləri ələ keçirə biləcəklər". Bəyanatda vurğulanıb ki, London sanksiyalara məruz qalan gəmilərin İngilis Kanalına girişini rədd edəcək. "Bu, öz növbəsində, operatorları ya daha uzun və daha bahalı marşrutlar seçməyə, ya da Böyük Britaniya qüvvələri tərəfindən saxlanılmaq riskini artırmağa məcbur edəcək", - deyə bəyanatda bildirilir.
Starmerin ofisi əlavə edib ki, Britaniya qüvvələri və hüquq-mühafizə orqanları hər bir gəmiyə ayrıca yanaşma tətbiq edəcək və saxlama əməliyyatı keçirməzdən əvvəl sənaye mütəxəssisləri ilə məsləhətləşəcəklər. "Gəminin saxlanmasından sonra, Böyük Britaniyanın sanksiya qanunlarını pozduğuna görə onun sahiblərinə, operatorlarına və heyətinə qarşı cinayət işi açıla bilər", - deyə bəyanatda bildirilir.
Ümumilikdə, Böyük Britaniya Rusiya ilə əlaqəli olduğu iddia edilən kölgə donanmasına aid 544 gəmiyə qarşı sanksiyalar tətbiq edib. 26 martda Helsinkidə keçiriləcək Birgə Ekspedisiya Qüvvələri (JEF) sammitindən əvvəl Starmerin ofisi digər JEF üzvlərini Rusiyanın "kölgə donanması" ilə mübarizədə koordinasiyanı gücləndirməyə çağırıb.
2014-cü ildə qurulan Birgə Ekspedisiya Qüvvələri, Birləşmiş Krallığın komandanlığı altında, 10 Skandinaviya ölkəsindən ibarət regional müdafiə ittifaqıdır: Birləşmiş Krallıq, Danimarka, İslandiya, Latviya, Litva, Hollandiya, Norveç, Finlandiya, İsveç və Estoniya. İştirakçı ölkələr vaxtaşırı birgə hərbi təlimlər keçirirlər. Onların bəyan etdiyi məqsəd Skandinaviya və Baltikyanı silahlı qüvvələrinin böhrana sürətli reaksiya vermək imkanlarını artırmaqdır.
Əziz MUSTAFA
