Müəllif: Tamara Mustafayeva, Banco.az
ABŞ-da xam neftin qiyməti də kritik həddi keçib.
Banco.azxəbər verir ki, Qərbi Texas xam nefti bir barel üçün 110 ABŞ dollarını keçdiyi halda, qlobal Brent neftinin qiyməti də bu səviyyəyə yaxınlaşıb. Avropada dizel yanacağı üzrə fyuçers qiymətləri isə 2022-ci ildən bəri ilk dəfə olaraq bir barel üçün 200 ABŞ dollarını ötərək yenidən artım tendensiyasına daxil olub.
Bu artımlar Donald Trampın müharibəni uğur kimi qiymətləndirdiyi və xalqa müraciət etdiyi çıxışından sonra baş verib. Prezident bildirib ki, ABŞ qarşıdakı iki-üç həftə ərzində İrana ciddi zərbə endirəcək və münaqişə başa çatdıqdan sonra Hörmüz boğazı “təbii olaraq” açılacaq. Bununla belə, o, konkret təfərrüatlar və ya dəqiq zaman cədvəli təqdim etməyib.
Fransa Prezidenti Emmanuel Makron isə boğazın yenidən açılması üçün hərbi üsullardan istifadənin real olmadığını bildirib.
Xam neft qiymətlərinə böyük diqqət yetirilsə də, emal olunmuş yanacaq bazarlarında qiymətlər daha yüksək səviyyələrdə formalaşır. Avropada dizel qiymətlərindəki kəskin artım qlobal iqtisadiyyat üçün potensial inflyasiya təzyiqini bir daha ön plana çıxarıb. Müxtəlif regionlarda alıcılar mövcud tədarükü əldə etmək üçün tələsərkən, bəzi tankerlər dünyanın müxtəlif istiqamətlərində minlərlə kilometr məsafə qət etməli olub.
Bizi sosial şəbəkələrdən izləyin!!
