Yaz fəslinin gəlişi ilə havalar tədricən istiləşir, günlər uzanır və evlərdə enerji istifadəsi də fərqli mərhələyə keçir. Xüsusilə yazın ikinci ayında, apreldə bir çox ailə qışdan çıxsa da, aylıq kommunal ödənişlərin hələ də büdcəyə ciddi yük yaratdığını hiss edir. Bəzən elə olur ki, hava isinməyə başlasa da, işıq, su və qaz sərfiyyatında gözlənilən azalma müşahidə edilmir.
“Yeni Sabah” xəbər verir ki, buna səbəb çox vaxt gündəlik istifadə vərdişlərinin dəyişməməsi olur.
Mütəxəssislər bildirirlər ki, yaz ayları kommunal xərclərə yenidən nəzarət etmək üçün ən uyğun dövrlərdən biridir. Çünki bu mövsümdə həm təbii işıqdan daha çox istifadə imkanı yaranır, həm də isitmə və soyutma cihazlarına ehtiyac qış və yayla müqayisədə nisbətən azalır. Bu da ailələr üçün əlavə qənaət fürsəti yaradır.
Aprel ayında işıq xərclərini azaltmağın ən sadə yollarından biri gün işığından maksimum yararlanmaqdır. Günlərin uzanması evlərdə elektrik lampalarından istifadə müddətini azalda bilər. Pəncərələrin önünü bağlayan əşyaları kənarlaşdırmaq, açıq rəngli pərdələrdən istifadə etmək və gündüz saatlarında otaqları təbii işıqla işıqlandırmaq elektrik sərfiyyatını azaltmağa kömək edir. İstifadə olunmayan otaqlarda lampaların söndürülməsi isə hələ də ən vacib qənaət qaydalarından biri olaraq qalır.
Elektrik xərclərinə təsir edən əsas məqamlardan biri də məişət texnikasının düzgün istifadəsidir. Məsələn, yaz aylarında paltarlar daha tez quruduğu üçün hər dəfə qurutma funksiyasından istifadə etməyə ehtiyac qalmır. Paltaryuyan maşının tam dolmadan işə salınması, televizorun və digər cihazların uzun müddət boş yerə açıq qalması, telefon adapterlərinin elektrik yuvasında saxlanması ay sonunda ümumi sərfiyyatı artırır. Xüsusilə “gözləmə rejimi”ndə qalan cihazlar fərq edilmədən enerji sərf etməyə davam edir.
Yaz mövsümündə qaz xərcləri adətən qışla müqayisədə azalır. Amma müəyyən qaydalara riayət edərək xərci daha da azaltmaq olar. Yemək bişirərkən qapaqlı qablardan istifadə etmək, yalnız lazım olan qədər su qaynatmaq, alovu qabın ölçüsünə uyğun seçmək kimi sadə addımlar qaz sərfiyyatını xeyli azaltmağa kömək edir. Bəzən ən böyük israf məhz mətbəxdə baş verir. Xüsusilə gündəlik çay, yemək və su isitmə zamanı bu detallara fikir vermək ciddi fərq yarada bilər.
Su sərfiyyatı isə ilin bütün fəsillərində büdcəyə təsir edən əsas xərclərdən biridir. Yazda ev təmizliyi, balkonların yuyulması, pəncərə silinməsi, həyət və bağ sahələrinin suvarılması kimi işlər artdığı üçün su istifadəsi də çoxalır. Bu səbəbdən suya qənaət məsələsi apreldə xüsusilə аktual olur. Damcılayan kranların vaxtında təmiri, qab yuyarkən suyun fasiləsiz axıdılmaması, lazımsız su istifadəsinin qarşısının alınması həm su sərfiyyatını, həm də aylıq ödənişi azalda bilər.
Yaz aylarında insanlar tez-tez evdə ümumi təmizlik işlərinə başlayırlar. Bu dövrdə bir çox elektrik cihazı daha çox işlədilir: tozsoran, paltaryuyan, ütü və digər məişət texnikası. Buna görə də bu cihazlardan planlı və düzgün istifadə vacibdir. Məsələn, ütünü hər gün az-az istifadə etməkdənsə, geyimləri toplu şəkildə ütüləmək daha qənaətlidir. Eyni yanaşma paltaryuyan və digər avadanlıqlara da aiddir.
Apreldə havalar nə tam isti, nə də tam soyuq olur. Bu keçid dövründə bir çox ailə bəzən səhər və axşam saatlarında əlavə qızdırıcı, günorta isə ventilyator və ya kondisioner işlətməyə başlayır. Məhz bu keçid mərhələsində enerji sərfiyyatına diqqət edilməsə, həm qaz, həm də elektrik xərcləri gözlənilmədən arta bilər. Evin havasını tez-tez təbii şəkildə dəyişmək, otaqları qısa müddətli, amma effektiv havalandırmaq daha sərfəli seçimdir.
Kommunal xərclərin azaldılmasında ailə üzvlərinin ortaq məsuliyyəti də mühüm rol oynayır. Təkcə bir nəfərin qənaət etməsi ilə istənilən nəticəni almaq çətin olur. Evdə hər kəs işıqdan, sudan və qazdan düzgün istifadə etdikdə aylıq ödənişlərdə fərq açıq şəkildə hiss olunur. Xüsusilə uşaqlara kiçik yaşdan suyu boş yerə axıtmamaq, otaqdan çıxarkən işığı söndürmək, istifadə olunmayan cihazları açıq saxlamamaq kimi vərdişlərin aşılanması gələcək üçün də faydalıdır.
Yaz ayları həm də enerji sərfiyyatını yenidən analiz etmək üçün münasib vaxtdır. Qışın yüksək xərclərindən sonra aprel ailələrə büdcəni toparlamaq, israfın qarşısını almaq və daha rasional istehlak modelinə keçmək imkanı verir. Kiçik görünən dəyişikliklər ay sonunda nəzərəçarpacaq qənaət yarada bilər.
Sadəcə gündəlik həyatdakı bəzi vərdişləri dəyişmək, təbii imkanlardan daha səmərəli yararlanmaq və resurslardan ölçülü istifadə etmək kifayətdir. Aprel ayı bu baxımdan ailə büdcəsini qorumaq üçün yaxşı başlanğıc nöqtəsi ola bilər.
Əsmətxanım Rzazadə
Telegram kanalımız
