ABŞ və İsrailin 28 fevraldan bəri İranla apardığı müharibə Suriya hökumətini də təhdid edir. İraqdakı şiə milislərin və Tehranın dəstəklədiyi Hizbullah-ın hücumlarına məruz qalan Suriya İranla müharibədə tərəfsiz qalmağa çalışır.
Hafta.az yazır ki, Suriya prezidenti Əhməd Şara bu yaxınlarda Böyük Britaniyaya səfəri zamanı Baş nazir Keir Starmerlə görüşüb.
London hökumətinin verdiyi açıqlamada hər iki ölkənin Hörmüz boğazının tam fəaliyyətini bərpa etmək üçün uyğun bir plana ehtiyac olduğunu vurğuladığı bildirilib.
Böyük Britaniyada yerləşən Chatham House beyin mərkəzi tərəfindən təşkil edilən tədbirdə çıxış edən Şara, ölkəsini müharibədən kənarda saxlamaq istəyini təkrarlayaraq deyib: "Bizim kifayət qədər müharibələrimiz olub. Başqa bir müharibə təcrübəsinə hazır deyilik".
14 illik dağıdıcı vətəndaş müharibəsindən sonra Suriyanı yeni bir münaqişəyə sürükləmək istəmədiyini vurğulayan lider deyib ki, Suriya heç bir tərəfin hədəfinə çevrilməyincə heç bir münaqişəyə qarışmayacaq. Amma təəssüflə qeyd edib ki, bu gün işlər ağıllı insanlar tərəfindən idarə olunmur, vəziyyət qeyri-sabit və gözlənilməzdir.
Lakin, Financial Times-ın təhlili göstərir ki, İran-İraq münaqişəsinin başlanğıcından bəri Suriya ərazisinə edilən hücumlar ölkənin tərəfsizlik siyasətini təhlükə altına qoyub.
Beyrutdakı Karnegi Yaxın Şərq Mərkəzinin Suriya üzrə eksperti Xeder Xaddur qeyd edir ki, müharibə nə qədər uzun davam edərsə, Dəməşq hökuməti münaqişəyə bir o qədər çox cəlb edilə bilər: “Suriya nə qədər uzun müddət tərəfsiz qala bilər? Müharibə nə qədər uzun davam edərsə, münaqişə bir o qədər çox yayılarsa, onun Suriyaya sıçraması riski bir o qədər yüksək olar”.
Ötən ay “Reuters” ABŞ-ın Şara hökumətinə Livanda Hizbullahı tərksilah etmək əməliyyatlarında iştirak etmək üçün təzyiq göstərdiyini bildirmişdi. Amma ABŞ-ın Ankaradakı səfiri və Suriya üzrə xüsusi nümayəndəsi Tom Barrak iddiaları təkzib edərək deyib: "ABŞ-ın Suriyanı Livana qoşun göndərməyə təşviq etməsi barədə məlumatlar həqiqətə uyğun deyil".
Xeddur həmçinin deyir: "Suriya silahlı qüvvələrinin belə bir şey etmək gücü yoxdur. Onların öz ərazilərini müdafiə etmək üçün gücləri çətinliklə çatır".
Digər tərəfdən, Dəməşq hökuməti İranla müharibənin yaratdığı böhrandan istifadə edərək investisiya cəlb etməyi hədəfləyir.
Avropa turu zamanı Almaniyaya da səfər edən Şara Berlində iş adamlarının görüşündə bildirib ki, Suriya Hörmüz boğazındakı vəziyyətin yaratdığı enerji böhranında "təhlükəsiz alternativ yol" təklif edir: Suriya təhlükəsiz sığınacaq kimi fəaliyyət göstərə bilər. Strateji mövqeyi sayəsində təchizat zəncirlərinin təhlükəsizliyini, eləcə də Aralıq dənizi sahili vasitəsilə enerji təchizatını təmin edə bilər.
İraq da uzun illərdən sonra bu həftə Suriya vasitəsilə avtomobil yolu ilə neft ixracına başlayıb. "Politico"nun məlumatına görə, İraq rəsmiləri yük maşınlarının daşınması uğurlu olarsa, Kərkük-Bəniyas boru kəmərinin təmir oluna və yenidən istifadə edilə biləcəyini bildirirlər.
Təhlildə Şaranın İranla müharibənin yaratdığı böhranda "fərqli bir kurs təyin etməyə çalışdığı" bildirilir. Media qurumuna danışan mənbələrdən biri deyib: "Müharibə Yaxın Şərqi fərqli düşünməyə məcbur edir".
