Bakı, 7 aprel, AZƏRTAC
Prezident İlham Əliyevin aprelin 6-da Gürcüstana dövlət səfəri çərçivəsində mətbuata verdiyi bəyanat iki ölkə arasında münasibətlərin mövcud vəziyyətini və gələcək inkişaf trayektoriyasını aydın şəkildə ortaya qoyan mühüm siyasi mesajlar toplusudur. Bu çıxış həm ikitərəfli əlaqələrin dərinliyini, həm də regionda formalaşan yeni geosiyasi reallıqları anlamaq baxımından xüsusi əhəmiyyət kəsb edir. Azərbaycan və Gürcüstan xalqları əsrlər boyu dostluq və qardaşlıq şəraitində yaşayıb. Bu münasibətlər müasir dövrdə dövlətlərarası əməkdaşlığın möhkəm təməlinə çevrilib. Bu gün münasibətlər artıq klassik qonşuluq çərçivəsindən çıxaraq strateji tərəfdaşlıq səviyyəsinə yüksəlib. Qarşılıqlı etimad və siyasi dialoq bu münasibətlərin əsas sütunlarını təşkil edir. Gürcüstanda müşahidə olunan siyasi sabitlik və əlverişli sərmayə mühiti Azərbaycan tərəfindən yüksək qiymətləndirilir. Məhz bu amillər ölkəyə xarici investisiyaların cəlb olunmasında həlledici rol oynayır. Azərbaycan investorlarının Gürcüstan iqtisadiyyatına 3,7 milyard dollar həcmində sərmayə yatırması iqtisadi əməkdaşlığın real nəticəsidir.
Bu fikirləri AZƏRTAC-a müsahibəsində Milli Məclisin deputatı Mehriban Vəliyeva deyib. O bildirib ki, ticarət dövriyyəsinin artan dinamika ilə inkişafı, 2025-ci ildə 800 milyon dolları keçməsi və 2026-cı ildə 1 milyard dollara çatmaq perspektivi iqtisadi əlaqələrin genişlənməkdə olduğunu göstərir: “Bu tendensiya gələcəkdə birgə investisiya layihələrinin üçüncü ölkələrə yönəlməsi ehtimalını da gündəmə gətirir ki, bu da tərəfdaşlığın yeni mərhələyə keçidi deməkdir. Azərbaycan və Gürcüstanın beynəlxalq təşkilatlarda bir-birinin ərazi bütövlüyünü və suverenliyini daim dəstəkləməsi regional sabitliyin qorunmasına xidmət edən mühüm amildir. Bu qarşılıqlı dəstək yalnız siyasi jest deyil, həm də beynəlxalq hüquqa əsaslanan prinsipial mövqeyin ifadəsidir. Prezident İlham Əliyevin bəyanatında xüsusi diqqət çəkən məqamlardan biri regionda formalaşan yeni geosiyasi vəziyyətlə bağlıdır. Cənubi Qafqazın münaqişə məkanından əməkdaşlıq və sabitlik platformasına çevrilməsi prosesi artıq reallığa çevrilməkdədir. Bu kontekstdə Gürcüstanın oynadığı rol xüsusi vurğulanır. Azərbaycan-Ermənistan sülh prosesinə toxunan dövlətimizin başçısı qeyd edir ki, davamlı sülh yalnız imzalanmış sənədlərlə deyil, real əməkdaşlıq mexanizmləri ilə möhkəmləndirilməlidir. Bu baxımdan ticarət əlaqələrinin inkişafı mühüm vasitə kimi çıxış edir və Gürcüstanın tranzit rolu bu prosesdə əhəmiyyətli yer tutur”.
Deputat qeyd edib ki, Azərbaycan-Gürcüstan əməkdaşlığının strateji istiqamətlərindən biri də enerji və nəqliyyat sahələridir: “Azərbaycan qazının 16 ölkəyə ixrac edilməsi və bu ixracın Gürcüstandan başlaması Gürcüstanın regionun enerji xəritəsindəki rolunu açıq şəkildə göstərir. Bakı-Tbilisi-Ceyhan neft kəməri və Cənub Qaz Dəhlizi kimi qlobal əhəmiyyətli layihələr artıq uzun illərdir ki, uğurla fəaliyyət göstərir. Bu layihələr təkcə region ölkələri üçün deyil, geniş coğrafiya üçün enerji təhlükəsizliyinin təmin olunmasında mühüm rol oynayır. Eyni zamanda, Orta Dəhliz çərçivəsində həyata keçirilən nəqliyyat layihələri Azərbaycan və Gürcüstanı Avropa ilə Asiya arasında əsas logistika körpüsünə çevirir. Bu istiqamətdə infrastrukturun genişləndirilməsi üzrə aparılan işlər regionun tranzit potensialını daha da artıracaq. Prezident İlham Əliyevin bəyanatından aydın olur ki, Azərbaycan-Gürcüstan münasibətləri qarşılıqlı hörmət, etimad və ortaq maraqlar üzərində qurulmuş nümunəvi tərəfdaşlıq modelidir. Bu model yalnız iki ölkə üçün deyil, bütövlükdə region üçün sabitlik və inkişaf nümunəsi kimi çıxış edir. Mövcud geosiyasi dəyişikliklər fonunda bu əməkdaşlığın daha da dərinləşəcəyi və yeni layihələrlə zənginləşəcəyi gözlənilir. Azərbaycan və Gürcüstanın birgə səyləri nəticəsində Cənubi Qafqazın dayanıqlı sülh, təhlükəsizlik və əməkdaşlıq məkanına çevrilməsi perspektivi isə getdikcə daha real görünür”.
