Milli Məclisin deputatı Hikmət Babaoğlu İranla ABŞ arasındakı bağlanan atəşkəs fonunda bir qrup iranmeyilli qüvvələrin sosial şəbəkələrdə İranın qələbəsinə sevinməsi, İrana dəstək ifadə etməsinin etiraz yaratmasına münasibət bildirib.
Deputat Pravda.az-a açıqlamasında deyib ki, regionda baş verən bütün hadisələrə hər bir Azərbaycan vətəndaşı Azərbaycanın mövqeyindən və təəssübündən çıxış edərək münasibət bildirməlidir.
H.Babaoğlu vurğulayıb ki, Azərbaycan müstəqil, XXI əsr tarixinin ən parlaq zəfərini ən qəddar düşmən üzərində əldə etmiş bir dövlətdir: “Buna görə də Azərbaycan vətəndaşlarının davranışları məhz bu çətir, qürur altında olmalıdır. Regionda, əlbəttə ki, Azərbaycan müharibə yox, sülh istəyir. Dövlətimiz dəfələrlə müharibənin baş verməməsi, sülh olması üçün təşəbbüslər edib. Qonşu İranda müharibə gedən zaman Azərbaycan Prezidenti dəfələrlə qonşu İran xalqına humanitar yardım göstərib, ancaq bugünkü reallıq budur ki, İran başqa dövlətdir, beynəlxalq münasibətlərin müstəqil aktorudur. Azərbaycan isə ayrıca müstəqil dövlətdir, beynəlxalq münasibətlər sisteminin aktorudur. Buna görə də Azərbaycan ictimaiyyətinin davranışları Azərbaycana dost olan müxtəlif ölkələr tərəfindən müşahidə edilir, qiymətləndirilir. Bu mənada hər bir Azərbaycan vətəndaşı ilk növbədə Azərbaycançı, Azərbaycan vətənpərvəri olmalı, baş verən hadisələri bu prizmadan qiymətləndirməyi bacarmalıdır. Azərbaycan xalqı o qədər böyük xalqdır ki, öz qələbə əzmi və öz qələbəsindən sevinməyə haqqı var”.
Aytəkin Qardaşova
