Azərbaycan əsilli belaruslu iş adamı Akif Qasımov keçmiş “Lennauçfilm” kinostudiyasının binasını satın alıb.
VAXT.AZ “Delevoy Peterburq” saytına istinadən xəbər verir ki, Vitebsk Radioelementlər Zavodu – “Monolit” Açıq Səhmdar Cəmiyyətinin direktorlar şurasının sədri Akif Qasımov Sankt-Peterburqda yerləşən keçmiş kinostudiyanın əmlakını əldə edib. Bazar dəyəriləndirməsinə görə, ümumi sahəsi 17,4 min kvadratmetr olan bina və 2 hektarlıq ərazi üçün təxminən 1 milyard rubl ödənilib.
Bildirilir ki, 2021-ci ildə hərraca qoyulan bu əmlak 475,5 milyon rubl ödəyən “Slavyanskoye” şirkəti tərəfindən alınmışdı. 2026-cı ilin mart ayında isə obyekt Severo-Zapadny Logistik Terminal şirkətinin mülkiyyətinə keçmişdi. Qeyd olunur ki, həmin şirkət 2024-cü ildən etibarən Akif Qasımova məxsusdur.
Keçmiş kinostudiya ərazisi perspektivdə yüksək potensiala malik olsa da, hazırda onun tam yenidən qurulması mümkün sayılmır. Ötən il binada ictimai məkan fəaliyyətə başlayıb və yeni sahibin bu layihənin inkişafını davam etdirəcəyi gözlənilir. İş adamının nümayəndəsinin sözlərinə görə, layihəyə yönəldiləcək əlavə investisiyalar əsasən təmir işlərinə, mühəndis infrastrukturunun yenilənməsinə və məkanın tanıdılmasına sərf olunacaq. Hazırda ərazidə yeni tikinti planlarının olmadığı bildirilib.
Layihə çərçivəsində obyektin yaradıcı sənaye sahələri üçün məkan kimi fəaliyyətini davam etdirəcəyi qeyd olunur. Yaxında təmir işləri və daxili ərazinin abadlaşdırılmasına başlanılacaq. Hazırda sahələrin təxminən 70%-nin icarəyə verildiyi, potensial icarədarlarla danışıqların davam etdiyi bildirilir.
Akif Qasımov sənaye investoru kimi tanınır. O, 2013-cü ildən etibarən “Monolit” zavodunun nəzarət səhm paketinə sahibdir və müəssisənin modernləşdirilməsi layihələrində iştirak edib. Onun investisiya portfelində elektronika, daşınmaz əmlak və digər sahələr var.
