Suraxanı rayonu, Yeni Ramana qəsəbəsi ərazisində yerləşən “Şuşa şəhərciyi” sakinləri artıq neçə gündür ki, dözülməz vəziyyətlə qarşı-qarşıya qalıblar.
NOCOMMENT.az-a müraciət edən vətəndaşların bildirdiyinə görə, ərazidə əsas kanalizasiya borusunun partlaması nəticəsində çirkli sular birbaşa yaşayış evlərinə və həyətyanı sahələrə axır. Sakinlər qeyd edirlər ki, artıq 5-6 gündür davam edən bu problem nəinki hərəkəti məhdudlaşdırır, həm də ərazidə kəskin qoxu və xəstəlik mənbəyi yaradır. Suların həyətlərdəki samanlıqlara və tikililərin bünövrəsinə dolması insanların əmlakına da ciddi ziyan vurur.
Şikayətçilərin sözlərinə görə, məsələ ilə bağlı aidiyyatı qurumlara dəfələrlə zəng edilsə də, hər dəfə “şikayətiniz qeydə alındı” cavabından başqa heç bir real addım atılmayıb.
Hazırda sakinlər çarəsiz vəziyyətdə kanalizasiya sularının evlərini yararsız hala salmasını izləmək məcburiyyətindədirlər.
Məsul şəxslərin bu laqeydliyi “Şuşa şəhərciyi”ndə yaşayan onlarla ailənin sağlamlığını və təhlükəsizliyini risk altına atır.
Tunar,
NOCOMMENT.az
