Böyük Britaniyanın milli təhlükəsizliyi ciddi risk altındadır. Bu barədə keçmiş NATO rəhbərlərindən biri olan Corc Robertson xəbərdarlıq edib. O, baş nazir Kir Starmer-in müdafiə siyasətini sərt şəkildə tənqid edib.

Robertson bildirib ki, ölkənin müdafiə sahəsində uzun illərdir davam edən investisiya çatışmazlığı Britaniyanı xarici təhdidlər qarşısında zəif vəziyyətə salıb. Onun fikrincə, hökumətin siyasi ritorikası ilə real addımları arasında ciddi uyğunsuzluq var.

Keçmiş NATO rəsmisi xüsusilə xəzinə və maliyyə siyasətini tənqid edərək müdafiə büdcəsinin yetərsiz olduğunu vurğulayıb. O, mövcud vəziyyəti “təhlükəli laqeydlik” adlandıraraq qərarların hərbi ekspertlər deyil, iqtisadi qurumlar tərəfindən verilməsini səhv kimi qiymətləndirib.

Robertsonun sözlərinə görə, Böyük Britaniya hazırda həm Rusiya–Ukrayna müharibəsi, həm də Yaxın Şərqdə artan gərginlik fonunda daha riskli dövrə daxil olub. O, müdafiə islahatlarının sürətləndirilməsinin vacibliyini vurğulayıb.

Hökumət isə müdafiə xərclərinin artırılacağını və uzunmüddətli 10 illik plan hazırlandığını açıqlayıb. Buna baxmayaraq, tənqidlər ölkənin təhlükəsizlik strategiyası ətrafında ciddi müzakirələri daha da gücləndirib.

aia.az
Tərcümə şöbəsi

• Nato
• Təhlükəsizlik
• Britaniya
• Tənqid
• Böhran
• Starmer