Yaponiya II Dünya müharibəsinin sonundan bəri ilk dəfə müdafiə ixracı qaydalarını yumşaldacaq. ABŞ prezidenti Donald Trampın siyasəti fonunda Tokionun belə bir addımı dünyanın müxtəlif yerlərində böyük maraq doğurub...
Poliqon xəbər verir ki, Reuters-in adı açıqlanmayan hökumət rəsmilərinə istinadən verdiyi məlumata görə, Yaponiya bu ay rəsmi olaraq yeni qaydaları qəbul edəcək. Potensial müştərilər arasında Polşa silahlı qüvvələri və Filippin Hərbi Dəniz Qüvvələri də var.
Sanae Takaiçi hökuməti tərəfindən təsdiqlənəcək ilk sövdələşmələrdən biri, Cənubi Çin dənizində Pekinlə dəniz qarşıdurması vəziyyətində olan Filippinə istifadə olunmuş freqatların ixracı olduğunu iki yapon rəsmisi bildirib. Raketdən müdafiə sistemləri də bundan sonra tətbiq oluna bilər.
Varşava və Tokio, həmçinin dron əleyhinə və elektron müharibə sistemləri üzrə əməkdaşlıq inkişaf etdirməklə bir-birinin arsenalındakı boşluqları doldurmağa kömək edə bilərlər, deyə Polşanın Yaponiyadakı səfirliyinin missiya rəhbərinin müavini Mariuş Boquşevski bildirib. Keçən il Polşanın WB Qrupu Yaponiyanın təyyarə istehsalçısı ShinMaywa ilə dronlar üzrə ilkin müqavilə imzalayıb.
Üç avropalı diplomat Yaponiyanın silah ixracı siyasətinin yaxınlaşan yumşaldılmasının Qərb ölkələrinin ABŞ-dan asılılığını azaltmasına kömək edəcəyini söyləyir. Trampın NATO-dan çıxmaq və Qrenlandiyanı işğal etmək kimi gözlənilməzliyi də silah tədarükünü şaxələndirmək istəyini artırıb.
Hakim partiya rəsmisi bildirib ki, Yaponiyanın silah ixracı qaydalarına etdiyi dəyişikliklərin məqsədlərindən biri Asiyada ABŞ-dan asılı olmayan müdafiə təchizat zəncirləri yaratmaqdır.
Poliqon.info
