Qaynarinfo saytından alınan məlumatlara görə, ain.az xəbər verir.
Brüssel Avropa İttifaqı (Aİ) daxilində aviasiya yanacağının ehtiyatlarının üzv ölkələr arasında bölüşdürülməsini tələb etməyə hazırlaşır. Buna səbəb Yaxın Şərqdəki münaqişə fonunda yay mövsümündə aviasiya yanacağı çatışmazlığı və uçuşların ləğvi riskidir.
Qaynarinfo xəbər verir ki, bu barədə "Financial Times” yazır.
Aİ-nin enerji məsələləri üzrə komissarı Dan Yorgensen bildirib ki, Avropa Komissiyası yanacaq ehtiyatlarına və emal güclərinə nəzarəti gücləndirəcək, tədarükü koordinasiya edəcək və lazım gələrsə, pandemiya dövründə vaksinlərin bölüşdürülməsinə bənzər şəkildə aviasiya yanacağını ölkələr arasında yenidən paylaya bilər.
"Biz əsasən yüksək qiymətlər böhranından çıxırıq və artıq tədarük böhranına doğru gedirik. Bunu ilk olaraq aviasiya yanacağı bazarında görəcəyik. Çox sürətlə bu vəziyyətə yaxınlaşırıq”, deyə o bildirib.
Yorgensenin sözlərinə görə, mümkün tədbirlər Aİ daxilində aviasiya yanacağının "birgə istifadəsi və yenidən bölüşdürülməsini” də əhatə edə bilər.
Avropada bir sıra aviaşirkətlər artıq uçuşları azaltmağa başlayıb. "Lufthansa” və "KLM” də yanacaq çatışmazlığı səbəbindən uçuş cədvəllərində ixtisar elan edən şirkətlər sırasındadır.
Komissar vəziyyətin ciddiliyini vurğulayaraq bildirib: "Biz açıq şəkildə deməliyik ki, vəziyyət kifayət qədər ağır olacaq və buna görə bu tədbirləri tətbiq edirik. Əgər münaqişə davam edərsə, real risk var ki, yay mövsümündə daha bahalı biletlər və hətta uçuşların ləğvi ilə üzləşə bilərik”.
Qeyd olunur ki, yanacaq tədarükünün Aİ daxilində yenidən bölüşdürülməsi planı siyasi fikir ayrılıqları yarada bilər və COVID-19 pandemiyası dövründə vaksinlərin paylanması zamanı yaşanan çətinlikləri xatırlada bilər.
Bununla belə, Yorgensen üzv dövlətlərin planı bloklamayacağına inandığını bildirib: "Aİ daxilində həmrəylik hissi mövcuddur və bu, birlikdə həll etməli olduğumuz bir böhrandır”.
Plan çərçivəsində Aİ ölkələri, yanacaq tədarükçüləri, hava limanları və aviaşirkətlərlə əməkdaşlıq ediləcək, alternativ yanacaq mənbələri araşdırılacaq. Məqsəd hər hansı bir regionun və ya ölkənin qeyri-mütənasib şəkildə zərər görməməsidir.
Bundan əlavə, Avropa Komissiyası "yanacaq observatoriyası” yaratmağı planlaşdırır. Bu sistem Avropada aviasiya yanacağı tədarükünü izləyərək istehsal və ticarət axınlarına nəzarət imkanı verəcək.
Brüssel həmçinin neft emalı güclərini və Aİ daxilindəki zavodların potensial yenidən qurulmasını qiymətləndirəcək ki, istehsal maksimuma çatdırılsın.
Yorgensen bildirib ki, strateji neft ehtiyatlarının istifadəsi də nəzərdən keçirilir, lakin bu məsələ növbəti həftə təqdim olunacaq ilkin təkliflərə daxil edilməyəcək.
Eyni zamanda Aİ ölkələrinin strateji ehtiyatlarında saxlanılacaq aviasiya yanacağı ilə bağlı xüsusi öhdəliklərin tətbiqi də gündəmdədir. Hazırda üzv dövlətlər ehtiyatlarda hansı neft məhsullarını saxlayacaqlarını özləri müəyyən edirlər.
Aydın
Ən son xəbərləri və yenilikləri almaq üçün ain.az saytını izləyin.
