Sechenov University və Russian Academy of Sciences nəzdində Hesablama Riyaziyyatı İnstitutunun alimləri sistemli skleroz xəstəliyinin müxtəlif əlamətlərinə qarşı ən uyğun preparatları müəyyən ediblər.
Redaktor.az xəbər verir ki, araşdırmanın nəticələri xəstələr üçün daha dəqiq müalicə seçiminə və yeni dərmanların hazırlanmasının sürətlənməsinə kömək edə bilər.
Sistemli skleroz autoimmun xəstəlikdir. Bu zaman immun sistemi bədənin öz toxumalarına hücum edir, iltihab yaradır, damarları zədələyir və dəri, ağciyər, ürək, həzm sistemi, böyrəklərdə fibroz prosesinə səbəb olur. Xəstəliyin əlamətləri pasiyentlərdə fərqli şəkildə özünü göstərə bilir.
Tədqiqatçılar 2 mindən çox pasiyentin iştirak etdiyi 32 klinik araşdırmanın nəticələrini birləşdirərək 23 hədəfli preparatın təsirini təhlil ediblər. Müqayisə üçün dəridə fibroz göstəricisi və ağciyər funksiyası üzrə əsas parametrlər nəzərə alınıb.
Nəticələrə görə, dəri fibrozunda iltihabi siqnal yollarına təsir edən preparatlar, o cümlədən JAK-kinaz inhibitorları və sitokinlərə qarşı anticisimlər daha effektiv olub. Ağciyər funksiyasının yaxşılaşdırılmasında isə B-hüceyrələrinə yönəlmiş terapiya, xüsusilə Rituximab və Belimumab daha uğurlu nəticə göstərib.
Alimlər həmçinin müəyyən ediblər ki, müalicənin maksimal təsirinin 50 faizi təxminən altı ay ərzində əldə olunur. Bu nəticənin gələcək klinik sınaqların planlaşdırılması baxımından əhəmiyyətli olduğu vurğulanıb.
NURİYYƏ
