Azpolitika.az portalından alınan məlumata görə, ain.az xəbər verir.
Rusiya sənayesi mart ayında artmağa başlayıb və əvvəlki aylardakı geriləməni üstələyib.
“AzPolitika” xəbər verir ki, bu barədə Rusiyanın rəsmi dövlət statistika qurumu olan “Rosstat”-ın yeni hesabatında məlumat verilir.
Dövlət qurumu iddia edir ki, yanvar ayında 0,9% və fevral ayında 0,8% azalmadan sonra sənaye istehsalı illik müqayisədə 2,3% artıb. “Rosstat”-ın məlumatına görə, mineral hasilatında artım fevral ayında 0,9%-dən 1%-ə yüksəlib, qeyri-resurs sənayesi isə tənəzzüldən çıxıb: mart ayında 3% artım fevral ayında 2,8% azalmanı tamamilə kompensasiya edib.
Beləliklə, rəsmi statistika, Prezident Vladimir Putinin hökuməti iqtisadi artım proqnozlarını yerinə yetirmədiyinə görə qəzəblə tənqid etməsindən və azalmanın qarşısını almaq üçün "konkret tədbirlər" tələb etməsindən bir neçə gün sonra istehsalda “yaxşılaşma olduğunu” bəyan edib.
Putin 15 apreldə hökuməti tənqid edən çıxışında demişdi: "Statistika göstərir ki, iqtisadi impuls təəssüf ki, iki aydır ardıcıl olaraq azalır. Ümumilikdə, yanvar-fevral aylarında ÜDM 1,8% azalıb”.
O şikayətlənmişdi ki, "İstehsal sektorları və bütövlükdə sənaye istehsalı mənfi dinamika göstərir”.
Putin, həmçinin makroiqtisadi göstəricilərin trayektoriyasının hökumətin və Mərkəzi Bankın proqnozlarından niyə aşağı olması barədə "ətraflı hesabat" tələb etmişdi.
Bu tənqidlərdən “nəticə çıxaran” “Rosstat” dünən bəyan edib ki, sənaye 1-ci rübdə ümumilikdə artım göstərib və bu, cəmi 0,3% təşkil edib. Lakin məsələ ondadır ki, hətta bu da hökumətin cari il üçün proqnozundan (2,3%) təxminən səkkiz dəfə aşağıdır. Qida istehsalı ilk üç ayda 0,2%, geyim istehsalı 13,8% azalıb, metallurgiyada azalma 10%-i keçib.
Makroiqtisadi Təhlil və Qısamüddətli Proqnozlaşdırma Mərkəzinin (CMASF) mütəxəssislərinin fikrincə, Rusiyada geriləmə əksər mülki sektorlara təsir edib və bunun episentrində maşınqayırma kimi investisiya tələbi ilə əlaqəli istehsal sahələri yer alıb. İrandakı müharibə səbəbindən neft qiymətlərinin artmasını nəzərə alsaq belə, onlar hesab edirlər ki, "bu il ÜDM artımının 1%-i keçməsi ehtimalı azdır və bu, investisiyaların kəskin azalması fonunda baş verir".
“AzPolitika.info”
Daha ətraflı məlumat və yeniliklər üçün ain.az saytını izləyin.
