ABŞ-ın müdafiə naziri Pit Heqsetin xanımı Cennifer Roşet Ağ Ev Müxbirləri Assosiasiyasının şam yeməyində geyindiyi paltarla sosial şəbəkələrdə müzakirə mövzusuna çevrilib.
Bizim.Media xəbər verir ki, Vaşinqtonda keçirilən tədbir əvvəlcə dəbdəbəli dünyəvi mərasim kimi başlayıb.
Qonaqlar qırmızı xalçada pozalar verərək bahalı geyimlərini və siyasi nüfuzlarını nümayiş etdiriblər.
Tədbirdə ABŞ Prezidenti Donald Tramp, birinci xanım Melaniya Tramp, mətbuat katibi Kerolayn Levit, FTB direktoru Keş Patel və digər yüksəkvəzifəli şəxslər iştirak ediblər.
Lakin gecənin ən çox danışılan simalarından biri 41 yaşlı Cennifer Roşet olub. Keçmiş “Fox News” prodüseri olan Roşet tədbirə açıq çiyinli, incə çəhrayı rəngli, bədənə oturan paltarda qatılıb.
Onun obrazını ipək draplı detal, parlaq broşlu kəmər, çəhrayı çanta, iri gümüşü platformalı sandal, hündür saç düzümü, brilyant sırğalar və dəbdəbəli boyunbağı tamamlayıb.
Əsl müzakirə isə sonradan başlayıb. Sosial şəbəkə istifadəçiləri Roşetin bahalı dizayner libası əvəzinə sürətli moda platformalarından birində satılan ucuz paltara çox bənzər geyim seçdiyini iddia ediblər.
“The Cut” yazır ki, “X” istifadəçilərindən biri Roşetin paltarını “Temu” saytında satılan oxşar modellə müqayisə edib. “New York Post” isə sosial şəbəkələrdə həmin paltarın “Shein”də 42 dollara satılan modelə bənzədiyinin yazıldığını qeyd edib.
Bəzi paylaşımlarda oxşar paltarın “Temu”da 20 dollardan, hətta 14 dollardan aşağı qiymətə təklif olunduğu iddia edilib.
Bu iddia “X” platformasında geniş müzakirələrə səbəb olub. Bəzi istifadəçilər yüksəkvəzifəli məmurun xanımının belə statuslu tədbirə “Temu” və ya “Shein” paltarına bənzər geyimdə qatılmasını tənqid edib, digərləri isə onu müdafiə ediblər.
“Fox News” şərhçisi Coui Cons bu seçimi “tamamilə dahiyanə addım” adlandırıb. Digər istifadəçilər də Roşetin ucuz geyimlə də zövqlü görünə bilməsini müsbət qarşılayıblar. “Əgər bahalı paltar geyinsəydi, yenə də daha çox tənqid edərdilər”, - deyə sosial şəbəkə istifadəçilərindən biri yazıb.
Cennifer Roşet isə hələlik paltarı “Temu”, “Shein” və ya başqa bir platformadan alıb-almadığını təsdiqləməyib.
Məsələ həm də ona görə diqqət çəkib ki, onun həyat yoldaşı Pit Heqset daha əvvəl Çinlə bağlı sərt açıqlamaları ilə gündəmə gəlmişdi. Bu səbəbdən sosial şəbəkələrdə bəziləri ABŞ müdafiə nazirinin xanımının Çinlə əlaqəli geyim seçməsini ironik hal kimi qiymətləndiriblər.
Qeyd edək ki, Ağ Ev Müxbirləri Assosiasiyasının şam yeməyi daha sonra silahlı şəxslə bağlı təhlükəsizlik insidenti ilə yadda qalıb.
Hadisədən sonra Tramp və digər yüksəkvəzifəli qonaqlar təxliyə olunublar.
Bizim.Media
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
