Uşaqlarda xroniki yuxu problemlərinin arxasında çox vaxt diqqətdən qaçan bir faktor dayanır: ağızdan nəfəs alma.
Pravda.az bildirir ki, bu vəziyyət sadə vərdiş deyil, uşağın inkişafına ciddi təsir edən tibbi problemdir.
Burun nəfəsi havanı süzür, nəmləndirir və bədənin oksigen təminatını tənzimləyir. Uşaq davamlı olaraq ağızdan nəfəs aldıqda aşağıdakı fəsadlar yaranır:
Yuxu keyfiyyətinin düşməsi: Beyin kifayət qədər dərin yuxu fazasına keçə bilmir, nəticədə uşaq səhərlər yorğun oyanır.
İnkişaf problemləri: Yuxuda ifraz olunan böyümə hormonları ləngiyir.
Üz və diş quruluşunun pozulması: "Ağızdan nəfəs alan üz siması" (uzunsov üz, dar çənə) formalaşa bilər.
Davranış pozuntuları: Yuxusuzluq uşaqlarda hiperaktivlik, diqqət dağınıqlığı və öyrənmə çətinliyinə yol açır.
Əsas səbəblər nələrdir?
Mütəxəssislər ağızdan nəfəs almanın kökündə adətən burun əti (adenoid) böyüməsi, allergik rinit və ya çənə darlığı kimi fiziki maneələrin dayandığını bildirirlər.
Tövsiyə: Əgər övladınız yatarkən ağzı açıq qalırsa, xoruldayırsa və ya çox tez-tez oyanırsa, mütləq qulaq-burun-boğaz mütəxəssisinə müraciət edin. Erkən müdaxilə həm yuxu keyfiyyətini, həm də uşağın akademik uğurunu birbaşa artırır.
Əminə Bayramova
