ain.az, Bizimyol saytından verilən məlumata əsaslanaraq xəbər yayır.
İsrail Ukraynanın “Panormitis” adlı gəmi ilə bağlı gördüyü tədbirlərə dair rəsmi müraciətini nəzərdən keçirir. Kiyev bu gəmini qanunsuz taxıl daşınmasında şübhəli sayır.
Bizimyol.info xəbər verir ki, İsrailin xarici işlər naziri Gideon Saar sənədlərin alındığını təsdiqləsə də, Ukrayna tərəfinin ünsiyyət formasını tənqid edib.
Ukrayna ilə İsrail arasında “Panormitis” gəmisi ətrafında diplomatik mübahisə yaranıb. Kiyev diplomatik və hüquqi kanallar vasitəsilə rəsmi şəkildə Qüdsə müraciət edib. Ukraynanın xarici işlər naziri Andrey Sibiqanın sözlərinə görə, Baş Prokurorluq Ukrayna məhkəməsinin gəminin həbsinə dair qərarına əsasən sorğu göndərib. İstintaq hesab edir ki, yük gəmisi beynəlxalq hüququ pozaraq, Rusiya nəzarətində olan ərazidə yerləşən qapalı limandan qanunsuz çıxarılan taxılı daşıyıb.
Sibiqanın sözlərinə görə, bu məsələ “Twitter diplomatiyası” deyil, konkret hüquqi yardım sorğusudur. O, həmçinin İsrailin məsələyə ciddi yanaşacağına və “emosional bəyanatlardan” çəkinəcəyinə ümid etdiyini "X" sosial şəbəkəsində bildirib.
Bu ittihamlara cavab olaraq İsrailin xarici işlər naziri Gideon Saar Kiyevin rəsmi proseduru gözləmədən ictimai açıqlamalar verməsinə təəccüb etdiyini bildirib. Onun fikrincə, əvvəlcə rəsmi sorğu təqdim olunmalı, daha sonra isə ictimai bəyanatlar verilməli idi. Saar qeyd edib ki, Ukrayna tərəfi İsrail hakimiyyətinə “gecə saatlarında” müraciət edib və indi bunu sosial şəbəkələrdə yeni paylaşımlarla müşayiət edir. O, həmçinin "X" hesabında bildirib ki, müraciət hazırda aidiyyəti qurumlar tərəfindən araşdırılır.
“Panormitis” gəmisi ilə bağlı vəziyyət hər iki ölkənin hüquq-mühafizə orqanlarının diqqət mərkəzində qalır. Ukrayna tərəfi qapalı limanlara daxil olan gəmilərlə bağlı sanksiya rejiminə və beynəlxalq qanunvericiliyə riayət edilməsində israr edir. İsrail isə rəsmi qarşılıqlı əlaqə protokoluna əməl olunmasının vacibliyini vurğulayır. Gəminin və onun yükünün İsrail sularındakı taleyi ilə bağlı yekun qərar hələ qəbul edilməyib, çünki müvafiq qurumlar təqdim olunan materialları yeni araşdırmağa başlayıblar.
Bizimyol.info
Hadisənin gedişatını izləmək üçün ain.az saytında ən son yeniliklərə baxın.
