Kremlin sözçüsü Dmitri Peskov Rusiyanın Neft İxrac Edən Ölkələr Təşkilatı (OPEC) və OPEC-ə daxil olmayan bəzi neft istehsalçısı ölkələrin formalaşdırdığı OPEC+ formatında qalmağa davam edəcəyini açıqlayıb. Onun sözlərinə görə, bu format enerji bazarlarındakı dalğalanmaları əhəmiyyətli dərəcədə minimuma endirməyə kömək edir.
Rusiya, Birləşmiş Ərəb Əmirliklərinin (BƏƏ) mayın 1-dən etibarən Neft İxrac Edən Ölkələr Təşkilatından (OPEC) və OPEC+ üzvlüyündən ayrılacağını bildirməsindən sonra açıqlama verib.
Marja xəbər verir ki, Kremlin sözçüsü Dmitri Peskov OPEC və OPEC-ə daxil olmayan bəzi neft istehsalçısı ölkələrin formalaşdırdığı OPEC+ formatında qalmağa davam edəcəklərini bəyan edib.
OPEC-in və OPEC+-ın fəaliyyətini davam etdirəcəyinə ümid etdiyini bildirən Peskov, OPEC+-ı xüsusilə qlobal bazarlarda mövcud təlatümlər fonunda mühüm təşkilat kimi xarakterizə edib.
Peskov BƏƏ-nin çıxış qərarına hörmətlə yanaşdıqlarını və Rusiyanın BƏƏ ilə enerji dialoqunun davam edəcəyinə ümid etdiyini vurğulayıb.
“OPEC ölkələri hasilatın imkan verdiyi qədər neft hasil etsələr, qiymətlər düşəcək”
Rusiyanın maliyyə naziri Anton Siluanov BƏƏ-nin OPEC-dən çıxması qərarının neft istehsalçısı ölkələrin hasilatı artıracağı və bunun da gələcəkdə qlobal qiymətləri aşağı salacağı anlamına gəldiyini bildirib. Siluanov, “Bu gün üzv ölkələrdən biri olan Birləşmiş Ərəb Əmirliklərinin OPEC-dən ayrıldığını eşidirik. Bu nə deməkdir? Bu, ölkənin istehsal gücünün imkan verdiyi ölçüdə neft hasil edə və onu bazara çıxara biləcəyi deməkdir”, - deyib.
Siluanov OPEC ölkələrinin BƏƏ-nin ayrılmasından sonra siyasətlərini koordinasiyasız şəkildə həyata keçirməsi halında isə neft qiymətlərinin düşəcəyini proqnozlaşdırıb.
Rusiya OPEC+-a 2016-cı ildə qoşulub. Beynəlxalq Enerji Agentliyinin proqnozlarına görə, OPEC+ ötən il dünya üzrə neft və neft məhsulları istehsalının təxminən 50 faizini təmin edib. BƏƏ OPEC+ daxilində dördüncü böyük istehsalçı mövqeyində olduğu halda, Rusiya, Səudiyyə Ərəbistanından sonra ikinci yeri tutur.
