Cari ilin mart ayının sonunda Azərbaycanda fəaliyyət göstərən bankların kredit portfeli 30 milyard 290 milyon manat olub.
FED.az biznes və maliyyə xəbərləri portalı xəbər verir ki, son bir ildə kredit portfeli 2 milyard 413 milyon manat (8,7%) artıb. Belə ki, ötən ilin mart ayının sonunda bankların kredit portfeli 27 milyard 877 milyon manat idi.
Kredit portfelinin 26 milyard 003 milyon manatını manatla verilmiş kreditlər, 4 milyard 287 milyon manatını isə xarici valyuta ilə verilmiş kreditlər təşkil edir. Yəni kredit portfelinin 85,8%- manatla verilmiş kreditlərin, 14,2%-i isə xarici valyutada verilmiş kreditlərin payına düşüb.
Başqa sözlə, dollarla verilən kreditlərin ümumi kredit portfelində payı 15%-dən aşağı düşüb. Xatırladaq ki, bir il əvvəl bu göstərici 15%-dən yüksək idi.
Belə ki, ötən ilin eyni dövründə kredit potfelində manatla verilmiş kreditlər 84,5% (23 milyard 566 milyon manat), xarici valyuta ilə verilmiş kreditlər 15,5% (4 milyard 311 milyon manat) yer tutub. Manatla verilmiş kreditlər son bir ildə 1,3 faiz bəndi artıb, xarici valyuta ilə verilmiş kreditlər 1,3 faiz bəndi azalıb.
2025-ci ilin mart ayının sonu ilə müqayisədə manatla verilmiş kreditlərin həcmi 2 milyard 437 milyon manat (10,3%) artıb, xarici valyuta ilə verilmiş kreditlərin həcmi 24 milyon 972 manat (0,6%) azalıb.
Manatla verilmiş kreditlərin orta faiz dərəcəsi 0,78 faiz bəndi artaraq 15,6%-ə, xarici valyuta ilə verilmiş kreditlərin orta faiz dərəcəsi 0,19 faiz bəndi artaraq 5,84%-ə yüksəlib.
