İsrail ordusunun Qəzzanın şimalına təşkil etdiyi hücum zamanı yaralanan HƏMAS hərəkatının Qəzza sektorundakı lideri Xəlil əl-Həyyənin oğlu Azzamın yerləşdirildiyi xəstəxanada həyatını itirdiyi bildirilib.
"Cebheinfo.az" xəbər verir ki, Fələstinli mənbələr İsrailin dünən axşam saatlarında Qəzza şəhərinin Dərəc məhəlləsinə təşkil etdiyi hava hücumu nəticəsində Azzamın ağır yaralandığını açıqlayıb.
Xəstəxanaya çatdırılan Azzamın həkimlərin bütün müdaxilələrinə baxmayaraq xilas edilə bilmədiyi qeyd olunub.
Digər tərəfdən, Xəlil əl-Həyyə “Al Jazeera” televiziyasına verdiyi və HƏMAS tərəfindən yayımlanan əvvəlki açıqlamasında oğlu Azzamın İsrail hücumunda yaralandığını bildirmişdi.
Hücuma münasibət bildirən əl-Həyyə, “İşğalçı sionist qüvvələrin dünən axşam Qəzza şəhərinin Dərəc məhəlləsinə təşkil etdiyi xain hücum nəticəsində oğlu Azzamın ağır yaralandığını, HƏMAS rəsmilərindən Həmzə Şərbasinin isə həyatını itirdiyini” demişdi.
Əl-Həyyə bildirib ki, bu hücum fələstinlilərə qarşı davam edən hücumların və 9 sentyabr 2025-ci ildə Doha şəhərində yerləşən Fələstin danışıqlar heyətinin hədəfə alınmasının davamıdır.
O, İsrailin təzyiq, qətl və terror yolu ilə istədiyini əldə etməyə çalışdığını vurğulayıb.
Əl-Həyyə açıqlamasında, “İşğalçı İsrailə və bizi eşidən hər kəsə səslənirəm. Bizim bir davamız var, nə övladlarımızın öldürülməsi, nə də liderlərin şəhid edilməsi bizi qorxuda bilər.
Uşaqlarımız Fələstin xalqının övladlarıdır. Mənim oğlum və ya başqa bir uşaq arasında heç bir fərq yoxdur. Hər biri üçün hiss etdiyimiz ağrı eynidir” ifadələrini işlədib.
