Sherg.az portalından əldə olunan məlumata əsasən, ain.az xəbər verir.
Qlobal araşdırma nəzakətin dünya xəritəsini ortaya qoydu. 26 ölkədən minlərlə insanın iştirak etdiyi sorğuda həm “ən nəzakətli”, həm də “ən mehriban” xalqlar müəyyənləşdirildi. Ölkələrin özlərini necə gördüyü ilə dünyanın onları necə qəbul etməsi arasındakı fərqlər isə diqqət çəkdi.
Sherg.az xəbər verir ki, maliyyə xidmətləri şirkəti Remitly tərəfindən keçirilən qlobal sorğuda 26 ölkədən 4600-dən çox insan iştirak edib. Respondentlərdən həm dünyanın ən nəzakətli ölkələrini seçmək, həm də öz ölkələrinin nəzakət səviyyəsini qiymətləndirmək istənilib.
Araşdırmanın nəticələrinə görə, dünyanın ən nəzakətli ölkəsi açıq fərqlə Yaponiya olub. İştirakçıların 35 faizdən çoxu yapon xalqını ilk sıraya layiq görüb.
Sosial harmoniya, hörmət və baş əyərək salamlaşma kimi köklü ənənələrin gündəlik həyatın bir hissəsi olduğu Yaponiya ən yaxın rəqibi Kanadanı iki dəfədən çox geridə qoyub.
Siyahıda ikinci yeri Kanada (13,35%), üçüncü yeri Böyük Britaniya (6,23%) tutub. İlk beşliyi Çin (3,07%) və Almaniya (2,80%) tamamlayıb.
Araşdırmada "ən mehriban xalqlar” kateqoriyasında isə sıralama dəyişib. Nəzakət siyahısında ikinci olan Kanada xaricilərə qarşı ən isti və qonaqpərvər ölkə seçilib. Onu Braziliya və Avstraliya izləyib.
Sorğunun ən maraqlı nəticələrindən biri isə Yaponiyanın özünü qiymətləndirməsi olub. Dünyanın ən nəzakətli ölkəsi seçilən Yaponiya, öz vətəndaşlarının qiymətləndirməsində 26 ölkə arasında sondan ikinci yerdə qərarlaşıb.
Mütəxəssislər bunu yapon mədəniyyətində təvazökarlıq və sadəliyin mühüm yer tutması ilə izah edirlər.
Öz nəzakətinə ən çox güvənən ölkələr isə Braziliya və Çili olub. 10 ballıq sistemdə hər iki ölkə 9,46 xal toplayıb. Hindistan isə 9,41 xalla üçüncü yerdə qərarlaşıb.
Araşdırma göstərib ki, nəzakət yalnız istifadə olunan sözlərlə ölçülmür, eyni zamanda davranış, münasibət və mədəni faktorlarla da formalaşır.
Dünyanın ən nəzakətli 25 ölkəsi
Yaponiya
Kanada
Böyük Britaniya
Çin
Almaniya
Filippin
İsveç
Danimarka
Finlandiya
Cənubi Afrika Respublikası
Avstraliya
İsveçrə
ABŞ
Hindistan
İrlandiya
Yeni Zelandiya
Norveç
Hollandiya
Tailand
Fransa
Braziliya
İspaniya
Belçika
İtaliya
Avstriya
Hadisənin gedişatını izləmək üçün ain.az saytında ən son yeniliklərə baxın.
