Müəllif:Mehin Qasımova,Banco.az
"Apple" şirkətinin "iPhone 17" seriyası Çin bazarında böyük uğurlar qazanır. 2026-cı ilin aprel - may aylarında ölkədə aktivləşdirilmiş cihazların sayı 29,19 milyona çatıb.
Banco.az xəbər verir ki, "iPhone 17" satışları sabit artım göstərir. Bu rəqəm 12-ci həftədə 25,98 milyon, 14-cü həftədə isə 27,22 milyon təşkil edib. 2025-ci ilin sentyabr ayında təqdim edilən bu smartfonlar satışa çıxarıldığı gündən bəri böyük maraq doğurub.
Statistikaya görə, Çində satışa çıxarıldığı ilk üç gün ərzində təxminən 1 milyon "iPhone 17" seriyalı cihaz aktivləşdirilib ki, bu da əvvəlki nəsildən 30 faiz çoxdur. 2026-cı ilin altıncı həftəsinə qədər ümumi say 20 milyon həddini keçib.
Seriyanın ən populyar modeli "iPhone 17 Pro Max" olaraq qalır. 2026-cı ilin fevral ayının ortalarına qədər bu modelin aktivləşdirilmiş nüsxələrinin sayı 10 milyonu keçib.
Rəqib "Xiaomi" Apple-ın nəticələrindən çox geridə qalır. "Xiaomi 17" seriyasındakı bütün modellər cəmi 4,736 milyon ədəd satılıb. Ən bahalı seçim olan "Xiaomi 17" Ultra isə 207 mindən bir qədər çox satılıb.
