Beynəlxalq hesabatda qlobal şərab bazarında geriləmənin davam etdiyi bildirilib...
Poliqon xəbər verir ki, Beynəlxalq Üzümçülük və Şərabçılıq Təşkilatının hesabatına əsasən, 2025-ci ildə dünyada şərab istehlakı son onilliklərin ən aşağı səviyyəsinə enib. Sənəddə qeyd olunub ki, qlobal şərab istehlakı ötən il ümumilikdə 208 milyon hektolitr təşkil edib ki, bu da 1957-ci ildən bəri qeydə alınan ən aşağı göstərici hesab olunur.
Hesabata görə, son illərdə dünya bazarında alıcılıq qabiliyyətinin zəifləməsi, inflyasiya, həyat tərzinin dəyişməsi və gənc nəsil arasında alkoqollu içkilərə marağın azalması şərab istehlakının aşağı düşməsinə təsir göstərən əsas amillər sırasında yer alıb. Mütəxəssislər xüsusilə Avropa ölkələrində ənənəvi şərab istehlakı mədəniyyətinin əvvəlki səviyyədə qalmadığını vurğulayıblar.
Buna baxmayaraq, ən böyük şərab bazarı statusunu yenə də Amerika Birləşmiş Ştatları qoruyub saxlayıb. Hesabatda bildirilib ki, ABŞ-də şəraba tələbat digər ölkələrlə müqayisədə daha yüksək olaraq qalır. İlk üçlükdə həmçinin Fransa və İtaliya yer alıb. Bu ölkələr həm istehlak, həm də istehsal baxımından qlobal bazarda aparıcı mövqelərini qoruyurlar.
Məlumata əsasən, Rusiya dünya üzrə ən çox şərab istehlak edən ölkələr arasında yeddinci sırada qərarlaşıb. Rusiyanın ümumi qlobal istehlakdakı payının təxminən 4 faiz olduğu qeyd edilib.
Ekspertlər hesab edirlər ki, yaxın illərdə dünya şərab bazarında ciddi artım gözlənilmir. Analitiklərin fikrincə, istehlak vərdişlərinin dəyişməsi və iqtisadi qeyri-müəyyənliklər qlobal şərab sənayesinə təsir göstərməyə davam edəcək.
Poliqon.info
