Qəzza zolağında səhiyyə sisteminin demək olar ki, tam çökməsi fonunda, sərhəd keçidlərinə tətbiq edilən məhdudiyyətlər səbəbindən xəstə uşaqların xaricdə müalicə alması çətinləşib.
AzEdu.az xarici mediaya istinadən xəbər verir ki, həkimin sözlərinə görə, ağır qidalanma çatışmazlığı və müxtəlif xəstəliklərdən əziyyət çəkən çox sayda uşaq təcili olaraq bölgədən kənara təxliyə olunmalıdır. Lakin sərhəd keçidlərindəki məhdudiyyətlər səbəbindən bu proses ləngiyir.
Həkim bildirib ki, 6 yaşlı Yasir Ərəfat ciddi qidalanma çatışmazlığı, infeksiyalar və dəri xəstəliklərindən əziyyət çəkir və onun tam müalicəsi üçün xaricə göndərilməsi vacibdir. Eyni vəziyyət bağırsaq problemi olan 6 aylıq Məhəmməd Misri və nevroloji problem şübhəsi olan 11 aylıq Misk Adini üçün də keçərlidir.
Onun sözlərinə görə, bütün bu uşaqlar üçün təxliyə sənədləri hazır olsa da, gündəlik keçid sayının məhdudluğu və sərhəd qapılarındakı məhdudiyyətlər səbəbindən xəstələr növbədə qalır. “Təəssüf ki, bəzi uşaqlar növbələri çatmadan həyatını itirir,” – deyə o bildirib.
BMT-nin son açıqlamalarında da Qəzzada milyonlarla insanın məhdud əraziyə sıxışdırıldığı və humanitar böhranın davam etdiyi qeyd olunub.
Rəsmi məlumatlara görə, minlərlə xəstə və yaralı xaricdə müalicə üçün növbə gözləyir, lakin təxliyə imkanlarının məhdudluğu səbəbindən proses çox yavaş gedir və bu vəziyyət xüsusilə uşaqların həyatını təhlükə altına salır.
