1996-cı ildə vurulan təyyarələrlə bağlı yeni hüquqi addım gündəmdədir...
Poliqon xəbər verir ki, CBS News telekanalının mənbələrə istinadən yaydığı məlumata görə, ABŞ hakimiyyəti Kubanın sabiq prezidenti Raul Kastro barəsində ittiham irəli sürməyə hazırlaşır. İddialara əsasən, ittihamlar 1996-cı ildə iki yüngül mühərrikli təyyarənin vurulması hadisəsi ilə bağlı ola bilər. Həmin insident nəticəsində “Brothers to the Rescue” (“Xilas üçün Qardaşlar”) humanitar təşkilatının dörd əməkdaşı həlak olmuşdu.
Məlumata görə, ittiham aktı qüvvəyə minməzdən əvvəl ABŞ-də fəaliyyət göstərən Böyük Münsiflər Heyəti tərəfindən təsdiqlənməlidir. CBS News-un məlumatında bildirilir ki, mümkün hüquqi addımlar Vaşinqtonun Havana hakimiyyətinə qarşı təzyiq siyasətinin bir hissəsi kimi qiymətləndirilir. ABŞ administrasiyası son illərdə Kuba rəhbərliyinə qarşı sanksiya və hüquqi mexanizmlərdən daha fəal şəkildə istifadə etməyə çalışır.
Hadisə 1996-cı ilin fevralında baş verib. Kuba Hərbi Hava Qüvvələrinə məxsus döyüş təyyarələri Florida boğazı üzərində iki “Cessna” tipli təyyarəni vurub. Təyyarələr ABŞ-də yerləşən və Kubadan qaçan miqrantlara yardım göstərən “Brothers to the Rescue” təşkilatına məxsus idi. Rəsmi Havana həmin uçuşların ölkənin hava məkanını pozduğunu iddia etmişdi.
ABŞ tərəfi isə vurulan təyyarələrin beynəlxalq hava məkanında olduğunu və humanitar missiya həyata keçirdiyini bildirmişdi. Təşkilat əsasən Kubadan qaçmağa çalışan şəxslərin xilas edilməsi, eləcə də ada ölkəsində siyasi təzyiqlərlə üzləşən insanlara dəstək göstərilməsi ilə məşğul olurdu. Bundan əlavə, təyyarələrdən Kuba ərazisinə hökumət əleyhinə vərəqələr də atılırdı.
Həmin dövrdə Raul Castro Kuba Silahlı Qüvvələrinə rəhbərlik edirdi və ölkənin əsas güc strukturlarına nəzarət edən şəxslərdən biri hesab olunurdu. ABŞ-də bəzi hüquq müdafiəçiləri və hadisə qurbanlarının ailələri uzun illərdir ki, məsul şəxslərin beynəlxalq hüquq qarşısında cavab verməsini tələb edir.
Mümkün ittihamların konkret maddələri və onların nə vaxt elan ediləcəyi hələ açıqlanmayıb. Kuba hakimiyyəti isə məsələ ilə bağlı rəsmi bəyanat verməyib.
Poliqon.info
