Mövzu ilə bağlı Ajans.az-a açıqlama verən deputat Aydın Mirzəzadə və politoloq Turan Rzayev seçkilərin mümkün nəticələri və regiona təsirləri barədə fikirlərini bölüşüblər. Aydın Mirzəzadə bildirib ki, Ermənistanda hakimiyyət dəyişikliyi baş verəcəyi təqdirdə, yeni rəhbərliyin Azərbaycanla normal qonşuluq münasibətləri qurması rəsmi Bakı tərəfindən müsbət qarşılanacaq. “Lakin, revanşist meyillərin güclənməsi regionda yeni gərginlik riskləri yarada bilər. Azərbaycan öz suverenliyini və ərazi bütövlüyünü təmin edib və hər hansı təhdidə adekvat cavab vermək gücündədir.” Turan Rzayev isə qeyd edib ki, seçkilərin nəticəsi ilə bağlı əsas ssenarilərdən biri hazırkı hakimiyyətin üstünlük qazanmasıdır: “Seçkilərin nəticələri ilə bağlı əsas ssenarilərdən biri hazırkı hakimiyyətin üstünlük qazanmasıdır. Alternativ olaraq müxalifətin, xüsusilə Robert Koçaryan düşərgəsinin qələbəsi regionda sülh prosesinə təsir göstərə bilər.” Ekspert həmçinin əlavə edib ki, belə bir halda Ermənistanın danışıqlar prosesində daha çox “yayınma” və “prosesin uzadılması” strategiyasına keçməsi ehtimalı var. Bu isə köhnə siyasi kontekstin yenidən gündəmə gətirilməsi və əlavə gərginliklərin yaranması deməkdir. Onun fikrincə, bu ssenari sülh gündəliyinin ləngiməsinə, hətta müəyyən mərhələdə dayanmasına səbəb ola bilər. Ekspertlərin fikrincə, Ermənistanda keçiriləcək seçkilərin nəticəsi Azərbaycan–Ermənistan sülh gündəliyinin gələcək istiqamətinə birbaşa təsir göstərə bilər.
