Motosikletlə səfər edən azərbaycanlı turistlə Qazaxıstan polisi arasında yaşanan səmimi dialoq sosial şəbəkələrdə böyük maraq doğurub.
Musavat.com xəbər verir ki, yolda hərəkətdə olan azərbaycanlı səyyahı Qazaxıstan polisi saxladıqdan sonra tərəflər arasında olduqca mehriban və qardaşcasına söhbət yaranıb.
Polis əməkdaşı turistdən hara getdiyini soruşur, daha sonra isə ona yollarda diqqətli olmağı, sürət həddini aşmamağı və qaydalara əməl etməyi səmimi şəkildə tövsiyə edir. Qazax polisinin mehriban davranışı və qayğıkeş münasibəti videonu izləyənlərin də diqqətini çəkib.
Dialoqun ən təsirli hissəsi isə polis əməkdaşının "Biz türkük, biz bir millətik" sözləri ilə azərbaycanlı turistə müraciət etməsi olub.
Sosial şəbəkələrdə geniş yayılan görüntülər türk xalqları arasındakı qardaşlığın, ortaq mənəvi bağların və qarşılıqlı sevginin növbəti nümunəsi kimi qiymətləndirilib.
Videoya münasibət bildirən sosial şəbəkə istifadəçiləri qeyd ediblər ki, Azərbaycan, Qazaxıstan, Türkiyə, Qırğızıstan, Özbəkistan, Türkmənistan və digər türk xalqları arasında mövcud olan bu bağlılıq təkcə siyasi münasibətlərdən ibarət deyil. Bu münasibətlərin əsasında ortaq tarix, ortaq kök, dil, din və əsrlərlə qorunub saxlanılan qardaşlıq dayanır.
Bir çox sosial şəbəkə istifadəçisi bu görüntüləri "Türk dünyasının gücü", "Qardaşlığın canlı nümunəsi", "Bizi ayırmaq istəyənlərə ən gözəl cavab" sözləri ilə paylaşır.
Bu səmimi dialoq bir daha göstərir ki, türk xalqları arasında sevgi, hörmət və birlik hissi illər keçdikcə daha da güclənir və türk dünyasının inteqrasiyası artıq sadəcə siyasi anlayış deyil, xalqların gündəlik münasibətlərində də özünü açıq şəkildə göstərir.
Musavat.com
