Bizimyol saytına istinadən ain.az xəbər verir.
AĞ Evin rəsmi saytında ABŞ Prezidenti Donald Trump ilə Çin Xalq Respublikasının sədri Si Cinpinq arasında keçirilən danışıqların yekunlarına dair kommünike yayımlanıb.
Bizimyol.info xəbər verir ki, məlumata görə, tərəflər qlobal sabitliyi gücləndirə biləcək məsələlər üzrə razılığa gəliblər.
Sənəddə vurğulanır ki, Vaşinqton və Pekin ədalət və qarşılıqlılıq prinsiplərinə əsaslanan, konstruktiv strateji sabitlik münasibətləri qurmağı hədəfləyir. Həmçinin tərəflər gələcək G20 və APEC sammitlərinə ev sahibliyi məsələsində qarşılıqlı dəstəklərini təsdiqləyiblər. Eyni zamanda Si Cinpinqin bu ilin payızında ABŞ-a rəsmi səfəri nəzərdə tutulur.
Beynəlxalq təhlükəsizlik sahəsində iki ölkənin liderləri İranın heç bir halda nüvə silahına sahib olmamalı olduğu mövqeyini bölüşüblər. Onlar Hörmüz boğazında dəniz nəqliyyatının maneəsiz təmin olunmasına çağırış ediblər və heç bir ölkə və ya təşkilata tranzit üçün birtərəfli rüsum tətbiq etməyə icazə verilməməli olduğunu bildiriblər. Bundan əlavə, Tramp və Si Cinpinq Şimali Koreyanın tam nüvəsizləşdirilməsi məqsədinə sadiqliklərini təsdiqləyiblər.
İkitərəfli iqtisadi münasibətlərdə də mühüm dəyişikliklər planlaşdırılır. Bunun üçün ABŞ və Çin iki yeni dövlətlərarası qurum yaradır: ticarət palatası və investisiya şurası. Ticarət palatası təhlükə yaratmayan ikitərəfli ticarət məsələlərinin tənzimlənməsi ilə məşğul olacaq. İnvestisiya şurası isə investisiya məsələlərinin müzakirəsi üçün daimi platforma rolunu oynayacaq.
Beynəlxalq ticarət sahəsində Çin tərəfi ABŞ-ın nadir torpaq elementləri və digər kritik minerallarla bağlı narahatlıqlarını nəzərdən keçirməyə razılaşıb. Bunlara ittrium, skandium, neodim və indium kimi elementlər daxildir. ABŞ administrasiyası həmçinin Çinin öz aviaşirkətləri üçün 200 ədəd "Boeing" təyyarəsinin ilkin alışını təsdiqlədiyini xatırladıb. Razılaşmalara əsasən, 2026, 2027 və 2028-ci illərdə Pekin ABŞ-dan hər il azı 17 milyard dollar dəyərində kənd təsərrüfatı məhsulları almağı öhdəsinə götürüb. Bundan əlavə, Çin hökuməti ABŞ-dan mal əti və quş əti idxalına qoyulan bütün mövcud məhdudiyyətləri tam aradan qaldırmağa razılaşıb.
Qadir, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
