Birinci Liqada “Mingəçevir”in böyük üstünlüyü

Futbol üzrə Azərbaycan Birinci Liqasında artıq başa çatmış 2025/2026-cı illər mövsümünün oyunlarını 25 min 710 tamaşaçı izləyib.

Arena.az xəbər verir ki, nəticəsi ləğv olunmuş “Zaqatala” – MOİK matçı nəzərə alınmaqla baş tutmuş 135 görüşdə orta göstərici 190-a bərabər olub.

Sonuncu – 27-ci turun “Mingəçevir” – “Səbail” görüşü mövsümün ən çox izləyici toplayan qarşılaşması olub. Mayın 22-də Yaşar Məmmədzadə adına Mingəçevir şəhər stadionunda baş tutmuş görüşü 2750 tamaşaçı seyr edib.

Mövsüm ərzində daha 4 dəfə bu göstərici 1000-ə bərabər olub. Bu matçların hamısına “Mingəçevir” ev sahibliyi edib.

14 görüşdə 11 min 520 seyrçi toplayan komanda bu göstəricidə böyük üstünlüklə hamını qabaqlayıb. Birinci Liqadakı ümumi tamaşaçı sayının təxminən 45 faizi “Mingəçevir”in payına düşür.

Orta tamaşaçı sayında “Zaqatala” 2-ci yeri tutub. Premyer Liqaya vəsiqə qazanmış “Şəfa” 3-cü olub.

	klub	tamaşaçı	oyun	orta
1	Mingəçevir	11520	14	823
2	Zaqatala	4360	13	335
3	Şəfa	3070	14	219
4	Səbail	2060	14	147
5	MOİK	1240	13	95,4
6	Baku Sportinq	1135	14	81,1
7	Difai	915	13	70,4
8	Şahdağ Qusar	510	13	39,2
9	Cəbrayıl	440	13	33,8
10	Şimal	460	14	32,9
	cəmi	25710	135	190