ABŞ ordusu, Prezident Donald Trampın İranın boğazın yenidən açılması ilə bağlı razılığa gəldiyini inkar etməsindən bir neçə saat sonra Hörmüz boğazında Amerika qüvvələrini və kommersiya gəmiçiliyini təhdid edən İranın PUA bazasına zərbə endirib.
Ölkə.az “reuters”ə istinadən xəbər verir ki, ABŞ rəsmisinin məlumatına görə, ABŞ ordusu İranın dörd hücum dronunu vurub və Bəndər Abbas liman şəhərindəki yerüstü idarəetmə məntəqəsinə zərbə endirib.
Rəsmi şəxs bildirib ki, bu hərəkətlər ölçülü, sırf müdafiə xarakterli idi və atəşkəsin qorunmasına yönəlmişdi.
Bu, ABŞ-ın bir həftə ərzində İrana ikinci hücumudur.
Qeyd edək ki, Tramp İran dövlət televiziyasında İran və Omanın birgə nəqliyyatın idarə olunması ilə Hörmüz boğazından kommersiya gəmiçiliyinin bərpası ilə bağlı qeyri-rəsmi razılaşma layihəsi aldığı barədə xəbəri təkzib edib.
Tramp heç bir ölkənin su yoluna nəzarət etməyəcəyini söyləyib və uzun müddətdir müttəfiqi olan Omana qarşı hərbi əməliyyatlarla hədələyib. “Heç kim (boğaza) nəzarət etməyəcək. Bunlar beynəlxalq sulardır və Oman hər kəs kimi davranacaq, əks halda onları partlatmalı olacağıq", - deyə o bildirib.
İran dövlət televiziyası bildirib ki, saziş layihəsində Amerika qoşunlarının yaxın ərazidən çıxarılması da nəzərdə tutulur, baxmayaraq ki, bölgədə Amerika qoşunlarının mövcudluğunun əlavə müzakirə tələb etdiyi qeyd olunub. Ağ Ev bu hesabatı "tamamilə uydurma" adlandırıb. İran televiziyasının saziş layihəsi ilə bağlı reportajında ABŞ-ın ləğv etmək istədiyi İranın nüvə proqramından heç bir bəhs edilməyib.
“Reuters”in məlumatına görə, İran mənbələri nüvə danışıqlarının ikinci mərhələdə baş tutacağını və bunun Trampın ən yaxın müttəfiqlərindən bəziləri üçün qəbuledilməz ola biləcəyini bildiriblər.
Xatırladaq ki, ABŞ və İran arasında atəşkəs aprelin əvvəlində qüvvəyə minib. Ötən həftə ABŞ və İranın atəşkəsi 60 gün müddətinə uzatmaq barədə anlaşma memorandumu hazırladığı, lakin razılaşmanın heçvaxt imzalanmadığı bildirilib .
Mənbələrin verdiyi məlumata görə, Tramp danışıqların tempindən narazılıqla yanaşı, hərbi əməliyyatlar da daxil olmaqla müxtəlif variantları nəzərdən keçirir - o, bu həftənin əvvəlində zərbələr endirməyə yaxın olsa da, Körfəz ölkələrinin müraciətlərindən sonra təxirə salıb.
Mürtəza
